Gizartea -
Suteak
Berriro egonkortu dute Arantzako sutea
Larunbat arratsaldean kontrolpean zuten suhiltzaileek, baina asteleheneko goizaldean berpiztu da. 130 hektarea kiskali ditu, dagoeneko.
AGENTZIAK | ERREDAKZIOA
Suhiltzaileek Arantzako sutea egonkortu dute, Nafarroan. 60 lagun ari dira lanean kontrolatzeko eta lurra freskatzeko, xede izanik saihestea haize bortitzak berriro berpiztea. Oraindik badaude hondar txiki batzuk gori-gori, eta horrek sutea sor lezake zenbait gunetan.
Hala adierazi du Nafarroako Gobernuak prentsa-oharrean. Asteleheneko goizaldean sutea berpiztu da, larunbatean kontrolpean zuten arren. Behin-behineko kalkuluen arabera, 130 bat hektareari eragin die suak.
Iturri horiek azaldu dute astelehen arratsaldeko lehen orduan Arantzako suteak ez duela ia sugarrik, baina tenperatura handia badu, eta baita zenbait puntu bero.
Gainera, haizea zakar dabil, eta horrek hondar goriak mugi lezake; hori oso arriskutsua da, sua hedatzeko aukera dago-eta. Egoera meteorologikoak, hala ere, hobera egingo du astelehenetik astearterako gauerditik aurrera.
Beste alde batetik, Igantziko sutea ere berpiztu da. Aurreko asteburuan jazo zen sute hori. Dena den, suhiltzaileek itzali dute, dagoeneko; laguntza-guardia dago bertan, erremate-lanak egiteko.
