Gizartea -
Lan-istripua
Irungo banatzaile bat hil da Beran izandako istripuan
Kamioi batekin talka egin ostean, furgonetako gidaria ibilgailu barruan harrapatuta hil da.
E. Lotina | eitb.eus
Irungo banatzaile bat hil da Beran (Nafarroa) izandako istripuan. 42 urteko gizonezkoak gidatzen zuen furgonetak kamioi batekin egin du talka. LAB sindikatuak lan-istriputzat jo du ezbeharra.
Kamioi batek eta furgoneta batek talka egin dute 64. kilometroan. Errepideak Iruñea eta Behobia lotzen ditu.
Nafarroako larrialdi zerbitzuak telefono deia jaso du 05:52an. Furgonetako gidaria konorterik gabe ibilgailu barruan harrapaturik zegoela jakinarazi dute deian. Guardiako talde medikoa, Oronozeko suhiltzaileak eta anbulantzia bat bertaratu dira.
Biktima bertan hil egin da eta suhiltzaileek gorpua erreskatatu dute. Gorpua Nafarroako Auzitegiko Medikuntza Institutura eraman dute autopsia egiteko. Kamioilaria onik atera da.
Istripuaren ondorioz errei bat itxi behar izan dute.