Gizartea -
Zirkulazioa
Kamioi batek guraizearena egin du N-1en eta ilarak sortu dira
Villabona parean izan da istripua. Bestalde, hiru pertsona zauritu dira Eskoriatzan gertatutako istripu batean.
Agentziak | Erredakzioa
Kamioi batek artaziarena egin du N-1 errepidean, Villabona parean (Gipuzkoa), Irungo noranzkoan. Ondorioz, lau kilometrorainoko auto-ilarak sortu dira gune horretan, Eusko Jaurlaritzako Segurtasun Sailak jakinarazi duenez.
Ezbeharra 06:20an jazo da, eta kamioia ezkerreko erreian gurutzatuta geratu da. Ertzaintzak erreia itxi behar izan du, baina 08:30erako berriz zabaldu du. Herri-lanetako langileek kamioia bidetik kendu dutenean, 09:45 aldera, etorri da bere onera zirkulazioa.
Hiru pertsona zauritu dira Eskoriatzan
Villabonakoa ez ezik, beste hainbat istripu izan dira goizean euskal errepideetan. Larrienetako batean, hiru pertsona zauritu dira, Eskoriatzan (Gipuzkoa), GI-3310 errepidean, bi autok talka eginda.
Ezbeharra 06:50ean jazo da, eta tarte batez guztiz itxi behar izan dute errepidea; zirkulazioa GI-627 errepidetik bideratu dute orduan. Hala ere, handik gutxira zabaldu dute berriro.