Gizartea -
Diputatuen Kongresua
Lehen urratsa indarkeria matxistaren aurkako Estatu itun bat adosteko
Genero indarkeriari buruz PPk eta PSOEk hitzartutako testu bat onartu du Kongresuak, aho batez.
AGENTZIAK | ERREDAKZIOA
Diputatuen Kongresuak lehen urratsa egin du astearte honetan indarkeria matxistaren aurkako Estatu itun bat adosteko, PPk eta PSOEk hitzartutako testu bat onartu baitu, aho batez.
Idatzian, popularrek eta sozialistek genero indarkeriari buruzko lantalde bat sortzea proposatu dute, Berdintasun Batzordearen baitan. Gainera, horrek “aurrekontu nahikoa” izan beharko duela adostu dute. Egungo legedia erreformatzea izango da helburua, emakumeen aurkako indarkeria ezberdinak gaineratzeko.
Oposizioko talde gehienek “babes kritikoa” agertu diote ekimenari, eta azken urteetan arlo honetan izandako murrizketak salatu dituzte. Horregatik, aurrekontuak nahikoak izatea aldarrikatu dute, biktimen babesa bermatzeko.
Genero indarkeriari buruzko epaitegietan, bikimek prozedura seguruenaren inguruko informazioa jaso ahal izatea da ekimenaren beste proposamenetako bat.
Gainera, talde parlamentarioek sentsibilizazio eta prebentzio plan nazionala modu iraunkorrean martxan egotea eskatu dute, eta indarkeria mota honekin lotutako delituetan indulturik ez emateko konpromisoa exijitu dute.
_______________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
