eitb.eus-ek bere 20 urteko historiako urte hasierarik onena lortu du

Euskal Irrati Telebistak bonbazia handian hasi du Interneteko hogeigarren urtemuga. Egunean batez beste 108.792 erabiltzaile bakarreko audientzia izan du eitb.eus-ek 2017ko urtarrilean.

Hilabetea itxi eta bi astera heltzen diren OJD Interactivaren auditoriak datuak baieztatzeko zain, EiTBren webgunearen 20 urteko historiaren urte hasierarik onena izan dela esan dezakegu.

Azken hilabetean, guztira 2.338.843 erabiltzaile bakar heldu dira eitb.eus-era.

Albisteak, 'Conquis' eta 'Go!azen' nabarmendu dira

Albisteak izan dira erabiltzaileek gehien kontsultatu dituzten edukiak. Hilero bezala, gertuko albisteak izan dira irakurrienak, baina urtarrilean, jarraipen handia izan dute Mundua atalak eta Donald Trumpen kargu hartzeak eta horrek hartutako lehen erabaki eztabaidagarriek, bereziki.

Entretenimendua alorrean, bi "izar" nagusi izan dira: 'El Conquistador del Caribe' saioaren hasiera, ETB2ko asteleheneko atalak eta asteazkeneko debate-saioak, eta 'Go!azen!' ETB1eko haur eta gazteentzako euskarazko musikala. Azken horren lehenengo denboraldia urtarrileko azken ostiralean amaitu zen.

1996ko abenduaren 19an EiTB Interneten eitb.com-ekin hasi zela gogoratzeko prestatutako eduki bereziak eskaintzen hasi direnean etorri da audientziaren erantzun aparta hori. Aurreko asteartean, urtarrilaren 31n, EiTB Talde osoak '20 urte ez da ezer' jardunaldia ospatu zuen, eta bi hamarkada hauetan nola bizi izan garen eta nola aldatu garen erakutsi dute.

EiTBko profesionalen garai hartako hainbat argazkik eta gaur egun jarrera berdinarekin egindako argazkiak ditugu ikusgai. Horregatik, otsail osoan erabiltzaileek argazkiak bidaltzeko aukera izango dute, eta orain dela 20 urteko argazkiak eta gaur egungoak bidaltzen dituztenak tablet baten zozketan sartuko dira.