Gizartea -
Frantziako Tourra
Tour Egunak Bizkaian barrena ibilbidea egingo du abuztuaren 7tik 2023ko ekainera
Lekeition hasi eta Igorren bukatuko da. Besteak beste, ekimenak tailer didaktikoak, praktika-pistak eta Tourraren museo bat izango ditu, eta tokian tokiko txirrindulariak eta klubak omenduko ditu.
EiTB Media
Bizkaiko Aldundiak, Frantziako Tourraren eskutik, 18 Tour Egun ospatuko ditu Bizkaiko beste hainbeste udalerritan, bizikletaren erabilera sustatzeko eta lurraldean zehar igaroko diren lasterketaren bi etapen "emozioa" aurreratzeko.
Besteak beste, ekimenak tailer didaktikoak, praktika-pistak eta Tourraren museo bat izango ditu, eta tokian tokiko txirrindulariak eta klubak omenduko ditu.
2023ko uztailaren 1ean eta 3an, Gran Départ Pays Basque Tourreko bi etapa izango dira Bizkaian. Unai Rementeria Bizkaiko ahaldun nagusiak azaldu duenez, Tour Eguna Tourraren etorrera ospatzeko jaia da, eta abuztuaren 7an abiatuko da Lekeition.
2023ko ekainera arte hainbat asteburutan ospatuko da Arena hondartzan (Muskiz eta Zierbena), Sopelan, Mungian, Zallan, Zornotzan, Leioan, Galdakaon, Santurtzin, Durangon, Basaurin, Getxon, Bilbon, Barakaldon, Gernikan, Markina-Xemeinen, Ermuan eta, azkenik, Igorren.
Bizkaiko Tourraren ibilbidea eta lasterketaren historia ezagutzera emateaz gain, Tour Egunaren helburu nagusia txirrindularitza sustatzea da, bai kirol arloan, bai mugikortasun arloan; hala, bizikleta eguneroko joan-etorrietarako garraiobide gisa erabiltzea bultzatuko da. Horretarako, 18 Tour Egunetako espazioan, familientzako jarduerak eta tailerrak antolatuko dira.
Tour Eguneko espazioak
Udalerri bakoitzean, Tour Eguna hainbat arlotako espazio mugatu batean ospatuko da, non hainbat jarduera egingo diren.
Tourreko tailerren gunean honako gune hauek egongo dira:
-Hezkuntza-ikasgela bat, non, jolasaren bidez eta Maxoo Tourreko maskota ofizialaren eskutik, txirrindularitzan, bizikletaren ezagutzan eta 14 urtera arteko neska-mutilen oinarrizko arauen ezagutzan sakontzen den.
-Bide-segurtasuneko gela bat, non modu seguruan bizikletan ibiltzen ikasteko, arauak jokoen bidez ezagutzeko, ekipamendu egokia erabiltzeko eta bizikletaz ibiltzean behar bezala jokatzeko jardungo den.
-Lantegi-gune bat, bizikleta mantentzeari eta konpontzeari buruzko oinarrizko nozioak ikasteko, bai eta lapurretak saihesteko babesari buruzkoak ezagutzeko ere.
-Bizikletak aukeratzeko eta probatzeko gune bat, non pertsona espezializatu batek erabiltzaile bakoitzarentzat egokiena den bizikleta motari eta neurriari buruzko aholkuak ematen dituen dauden moten arteko zalantzak argituz; hiriko bizikletak, errepidekoak, mendikoak, tolesgarriak, elektrikoak.
-Txirrindularitza eta mugikortasun jasangarria sustatzen duten tokiko klub eta txirrindularientzat gordetako gunea.
Gune horiekin batera, praktiketarako eremu bat prestatuko da, bi pista dituena:
-Hastapenetarako pista bat, espezialistek gainbegiratua, 2 eta 10 urte bitarteko haurrak bizikletaren erabileran ohitu daitezen.
-Txirrindularitzan hasita dauden 6-14 urteko haurrentzat egokitutako pump track pista.
Era berean, Frantziako Tourraren eta Bizkaiko Tourraren historiari buruzko erakusketak izango dira ikusgai, Vicente Blancok 1910eko edizioan parte hartu zueneko garaira itzuliz.
Datak
2022 / 8 / 7 Lekeitio
2022 / 8 / 14 Arena (Muskiz eta Zierbena)
2022 / 8 / 21 Sopela
2022 / 9 / 18 Mungia
2022 / 10 / 9 Zalla
2022 / 10 / 23 Zornotza
2022 / 11 / 6 Leioa
2022 / 11 / 20 Galdakao
2022 / 12 / 18 Santurtzi
2023 / 2 / 12 Durango
2023 / 2 / 26 Basauri
2023 / 3 / 12 Getxo
2023 / 3 / 26 Bilbao
2023 / 4 / 23 Barakaldo
2023 / 5 / 7 Gernika
2023 / 5 / 21 Markina-Xemein
2023 / 6 / 4 Ermua
2023 / 6 / 18 Igorre