Familia-sarerik gabeko 116 gazte gizarteratu dira Trapezistak programari esker

Trapezistak familia-sare baten babesik ez duten gazteak gizarteratzen laguntzeko programak fruituak eman ditu. Urtebetean 116 pertsonari lagundu die beren helburuak lortzen, eta horiek programa utzi dute jada, dagoeneko ez dutelako behar. Berdintasun, Justizia eta Gizarte Politiketako Sailak programaren balantzea egiteko orduan adierazi duenez, horien laurdenek gaur egun beren baliabideekin eusten diote bizi-proiektu bati.

Ekimen honetan artatutako pertsona gehienak Magrebetik edo Saharaz hegoaldetik etorritakoak dira, batez beste 22 urte dituzte, urte eta erdi daramate Euskadiko hiri-ingurune batean bizitzen, eta ez dute babesteko sare sozialik.

Programa honek 450 pertsonari lagundu die, eta gehienak gizonezkoak dira (13 bakarrik dira emakumeak). Gehienak (317) Bizkaian daude, programa hasi zen lurraldean. Gipuzkoan, berriz, 79 gizoni lagundu diete, eta Araban uztailean hasi dira aplikatzen.

Herena autonomoa da gizarte-babeserako sistemak erabiltzen, eta horien % 77k beren baliabide ekonomikoak kudeatzeko gaitasun handia edo ertaina dute. Gainera, laurdenak lan-merkatuan sartu dira edo sartzeko zorian daude. Guztira, 63k sinatu dute urtebetetik gorako lanaldi osoko kontratu bat.

Eusko Jaurlaritzarekin batera, 25 erakundek baino gehiagok lan egiten dute EAEko hiru lurraldeetan, Agintzari erakundeak koordinatuta, pertsona horiei prestakuntza eta aholkularitza eskaintzeko, lan-merkatuan sar daitezen eta beren eskubideak erreklamatzen jakin dezaten. Azken helburua programatik ateratzea da, beren kabuz bizitzeko.

Gizarte zerbitzuek pandemian izandako esperientziak eragin zuen ekimena. Konfinamendu betean, ehun pertsona baino gehiago kalean bizi zirela konturatu ziren, familiaren edo gizartearen laguntza-sarerik gabe.

Gasteizko Txiribuelta akrobazia eta zirku eskolarekin batera egindako ekitaldi batean, Nerea Melgosa sailburuak gizarte erakundeen lana goraipatu du, eta nabarmendu du horien laguntzarekin Trapezistak programak "bizitzan oinarrizkotzat jotzen ditugun bost eskubideak" berma ditzakeela: osasuna, enplegua, etxebizitza, diru-sarrerak eta Gizarte Segurantza. "Badakigu bidean lagundu behar diegula", erantsi du.