Mundua -
Homosexualen eskubideak
Alemaniak homosexualen artean ume biologikoen adopzioa bultzatu du
Alemaniako homosexualek beren izatezko bikotekideen seme-alaba biologikoak adoptatzeko aukera izango dute, baina bikote moduan ezin izango dute umerik adoptatu.
Erredakzioa
Alemaniako Gobernuak onartutako lege-egitasmo bati esker, alemaniar homosexualek euren bikotekideen seme-alabak adoptatzeko aukera izango dute, erregistro zibilean izatezko bikote moduan izena eman badute.
Lege-proiektu honekin, Exekutiboak Auzitegi Konstituzionalak 2013an emandako epai bati erantzuten dio. Epaiak diskriminatzailetzat jo zuen indarrean dagoen araudia, seme-alaba biologikoen adopzioa soilik bikote heterosexualen kasuetan aurreikusten baitu.
Auzitegi Konstituzionalak diskriminatzailea ez den araudi berri bat premiaz, ekainaren 30a baino lehen, indarrean sartzeko agindua eman du. Hori dela eta, lege-egitasmoa hurrengo asteetan Parlamentuan aztertzea espero dute.
Auzitegi Konstituzionalak homosexualen eskubideak bermatzeko beste hainbat epai ere eman ditu; izan ere, horien eskubideak eta heterosexualenak oraindik ez dira parekatu.
Alemanian ezkondu nahi duten homosexualek erregistro zibilean izatezko bikote moduan izena eman besterik ezin dute egin. Hortaz, bikote heterosexualekin alderatuz, ezberdintasun nabariak daude fiskalitate, oinordetza eta adopzio kontuetan.
Azken urteetan, berdintasuneranzko bidea egin da, hein handi batean homosexualen eskubideak bermatzen dituzten epai horiei esker. Baina Alemanian homosexualek bikote moduan oraindik ezin dute umerik adoptatu.