EITBk 'Charlie Hebdo'ren aurkako atentatua gaitzetsi du

Maite Iturbe EITBko zuzendari nagusiak Charlie Hebdo astekari frantziarraren aurkako atentatua gaitzetsi du gaur goizean. “Indarkeriak hedabide bati eraso egiten dionean adierazpen askatasunari eta gizarte osoari eraso egiten dio”, azpimarratu du.

Horren harian, “adierazpen askatasunaren aurka aritu den indarkeriaren zentzugabekeria” nabarmendu du EITBko zuzendari nagusiak. “Charlie Hebdoren familia osoarekin bat egiten dugu, elkartasuna adieraziz”, gaineratu du.

Bestalde, Euskal Irrati Telebistako Erredakzio Kontseiluak “dolua eta elkartasuna” adierazi die ‘Charlie Hebdo' aldizkariko lankideei “jasan duten eraso basatiaren aurrean”.

“Tolerantzia eta adierazpen askatasuna galarazteko ahaleginak beti dira salagarriak, eta bereziki onartezinak kasu honetan bezala inolako gizatasunik gabe bizitzaren kontrako eraso bidez datozenean”, adierazi du Erredakzio Kontseiluak.