Estatu Islamikoak Etxe Zuriari ere erasoko diola mehatxatu du

Estatu Islamikoak beste bideo bat argitaratu du ostegun honetan. Ameriketako Estatu Batuetako Etxe Zuriari ekintzaile suizidak eta bonba-autoak erabilita erasoko diotela agindu dute.

Sei minutuko bideoa Parisen egindako sarraskiari buruzko albisteekin hasten da, eta beltzez jantzitako bi milizianok hitz egiten dute bertan.

Gainera, Frantziako “monumentuak” eta Erroma, Vatikanoaren egoitza, “kolpatuko” dituztela ohartarazi dute.

Barack Obama AEBko presidentea eta François Hollande Frantziako buruzagia ere mehatxatu dituzte. “Gerriko lehergailuak eta bonba-autoak erabilita kiskaliko ditugu”, esan dute.

Parisko atentatuak izan zirenetik, Washington, New York, Erroma eta Al Andalusen erasoak egingo dituztela adierazi dute.

AEBko Estatu Departamentuak esan du mehatxu guztiak “seriotasun osoz” hartzen ari direla, eta, ondorioz, bideoa egiazkoa den edo ez aztertzen ari direla jada.

FBIren esanetan, berriz, ez dago inolako zantzurik AEBn Parisen egin zituzten moduko erasoak prestatzen ari direnik pentsatzeko.