Mundua -
Nigeria
Boko Haramek Nigerian bahitutako 200dik gora neskatatik 21 askatu ditu
Talde jihadistak eta Nigeriako Gobernuan izandako negoziazioen ondorioa izan da. 270 neska inguru bahitu zituzten 2014an eta oraindik 218k gatibu jarraitzen dute.
AGENTZIAK | ERREDAKZIOA
Boko Haram taldeak duela bi urte eta erdi Nigeriako Chibok hirian bahitu zituen 200dik gora neskatatik 21 askatu ditu, Nigeriako gobernu iturriek jakinarazi dutenez.
Mallam Garba Shehu Nigeriako Presidentetzako bozeramailearen esanetan, Boko Haramek aske utzi ditu 2014ko apirilean bahitutako neska horietatik 21 eta Estatuko Segurtasun Zerbitzuen zaintzapean daude orain.
Aipaturiko neska horien askapena Nigeriako Gobernuaren eta Boko Haram taldearen arteko negoziazioen ondorioa izan da. Shehuk haren Twitter kontuan adierazi duenez, Gurutze Gorriaren eta Suitzako Gobernuaren laguntza ere beharrezkoa izan da.
Bozeramaileak gaineratu duenez, bi aldeek negoziatzen jarraitzen dute.
Mohammadu Buhari Nigeriako presidenteak askapena txalotu du, Shehuren arabera.
Jihadistek 270 neska inguru bahitu zituzten 2014an eta oraindik 218k gatibu jarraitzen dute.
