Mundua -
GAZA, ERASOPEAN
Israelek Rafahn eskala handiko erasoari ekiten badio, arma-bidalketa etengo duela iragarri du Bidenek
"Bakarrik egon behar badugu, bakarrik egongo gara", azpimarratu du Benjamin Netanyahu Israelgo lehen ministroak Joe Bideni bidalitako mezu batean, AEBk armamentua bidaltzeari utziko diola mehatxu egin ostean.
AGENTZIAK | EITB MEDIA
Estatu Batuek lehen aldiz Isralerako arma-bidalketa etengo dute, baldin eta azken horrek Rafahn eskala handiko erasoaldia hasten badu. Joe Biden Ameriketako Estatu Batuetako presidenteak egin du iragarpena bart, CNN telebista-katean eskainitako elkarrizketan. Aitortu du Israelera bidali dituzten armak Gazako Zerrendako herritar zibilak hiltzeko erabili direla. Egun, 1,4 milioi desplazatu palestinar daude Rafahn errefuxiatuta.
"Tropak Rafahn sartzen badira, ez dugu armarik bidaliko Israelera", esan du Bidenek. Horren hitzetan, "historikoki" Hamasen kontrako borrokan "laguntzeko" bidali dira era ezberdinetako armak Israelera. "Arma horiekin, orain, zibilak hiltzen ari dira Gazan", erantsi du.
Halaber, buruzagi estatubatuarrak zehaztu du Israelek Rafahn "oraindik" ez duela "marra gorria gurutzatu". "Biztanle-dentsitatea handia den guneetan, momentuz, ez dira sartu".
"Bakarrik egon behar badugu, bakarrik egongo gara"
"Bakarrik egon behar badugu, bakarrik egongo gara", azpimarratu du Benjamin Netanyahu Israelgo lehen ministroak Joe Bideni bidalitako mezu batean, Israelek Rafahn operazio militar handi bat egiten badu AEBk armamentua bidaltzeari utziko diola mehatxu egin ostean.
"Gaur askoz indartsuagoak gara. Gure etsaia eta gure arimak bilatzen dituztenak garaitzeko prest gaude. Bakarrik egon behar badugu, bakarrik egongo gara. Azazkalekin eta hortzekin borrokatuko gara (...) Elkarrekin irabaziko dugu", azpimarratu du Netanyahuk bere kanaletan zabaldutako bideo batean.
"Etsigarria"
Bidenek iragarpena egin eta berehala, Gilad Erdan Israelek Nazio Batuen Erakundean duen ordezkari iraunkorrak "etsigarrigarritzat" jo du arma-bidalketa etetearen aukera. Esan duenez, Israeli presio egiteak "etsaien helburuei egiten die mesede". Iran, Hamas eta Hezbola aipatu ditu.
Erdanek nabarmen du AEBtik jasotako armak "defentsarako" erabiltzen dituztela, "herritarren segurtasuna babesteko".
Kan Israelgo irrati-kate publikoan edin ditu adirazpenok NBEko ordezkariak. Rafahn "milaka terrorista ezkutatuta" daudela adierazi ondoren, galdera bota du: "Israeli Rafah sartzeko mugak jartzen bazaizkio, nola suntsituko dugu Hamas?".