Politika -
Balearrak
Jaume Matasi eroskeria delituagatik jarritako zigorra berretsi dute
Balearretako Gobernuko eta hango PPko presidente ohiak 9.000 euroko isuna ordaindu beharko du, Balearretako Justizia Auzitegi Nagusiak ez baitu haren helegitea aintzat hartu.
Erredakzioa
Balearretako Justizia Auzitegi Nagusiko Arlo Zibileko eta Zigor Arloko Aretoak Jaume Matas Balearretako Gobernuko eta bertoko PPko presidente ohiaren kontra jarritako zigorra berretsi du. Hortaz, Matasek 9.000 euroko isuna ordaindu beharko du, Maite Areal emazteari Valparaiso hotelean kontratu bat egiteagatik.
Auzitegi Nagusiak ez du aintzat hartu Matasek jarritako helegitea, eta epaimahai batek aurreko abenduan jarritako zigorra berretsi du.
Hau da Jose Maria Aznarren garaian Ingurumen ministroa izandakoak jasotako bigarren zigorra; izan ere, Palma Arena auzian bederatzi hilabeteko espetxe-zigorra ezarri zioten. Goi-kargudun ohia Espainiako Gobernuak indultua noiz erabakiko duen zain dago, berak hala eskatu baitzuen bederatzi hilabeteko zigorra ez betetzeko.
Juan Jimenez Balearretako Lurralde Auzitegiko epailearen arabera (berak gidatu zuen Matasen kontrako epaiketako epaimahaia), presidente ohiak jasotako 42.111 euroak "dohaintza" baten bidez jaso zituen eta "ez bere emazteak egindako lanagatik".
