Frantzian eraso egitea agindu zien Estatu Islamikoak hiru atxilotuei

Siriako Estatu Islamikoko kide batek Frantzian eraso egitea agindu zien astelehen honetan Frantziako hainbat hiritan atxilotutako hiru lagunei, Frantziako Fiskaltzak berri eman duenez.

Atxilotuen material informatikoa eta telefonoak aztertu ondoren, lehergaiak egiteko dokumentuak, Estatu Islamikoaren propaganda, armen erabilerari buruzko gidak edota hilketen bideoak atzeman dituzte, Ministerio Publikoak ohar bidez jakinarazi duenez.

Ismael K. (17 urte), Djebril A. (23 urte) eta Antoine F. (19 urte) atxilotuak gaur utzi dituzte Fiskaltzaren esku. Fiskalak ekintza terroristak prestatzeko eta pertsonen kontrako atentatuak prestatzeko elkartzea leporatzen diete eta hiru atxilotuak behin-behinean kartzelara bidaltzeko eskatu du.

Aipaturiko erregistro horietako batean, Ismael K. eta Siriako Estatu Islamikoko kontaktu baten arteko informazioa atzeman du Poliziak. Frantziako agintariek Ismael K. atxilotuari herrialdetik ateratzeko ezarritako debekua tarteko, "Frantzian eraso egitea" agindu zion.

Taldeko "bultzatzailea" izatea leporatzen dioten gazteak Poliziaren aurrean aitortu zuen Itsas Armadaren Port Vendreseko kuartelaren (Perpignan hegoaldean) kontra eraso egitea proposatu ziela gainerako bi atxilotuei. Antza denez, atxilotuetako batek zelatari gisa lan egin zuen inguru horretan Armadarako ez gai izendatu aurretik.

Ismaelek aitortu zuen zaintza dorreko militarrak hiltzea eta horien arduradunari lepoa mozteko asmoa zuela, eta hori guztia grabatu ondoren Siriara ihes egitea.

Atxilotuen euren testigantzen arabera, erasoa abendua amaieran edota urtarrila hasieran egitea aurreikusten zuten, hain zuzen ere, kuartelean zaintza txikiagoa den unean.

Bestalde, hiru atxilotuak sare sozialen bidez ezagutu zirela uste du Poliziak eta Siriara ihes egiteko asmoa zutela, baina horietako batek Frantziatik irteteko zuen debekua tarteko, beren asmoak aldatu zituztela.