Desberdintasunari aurre egiteko ekintzak aldarrikatu ditu EH Bilduk

Jasone Agirre EH Bilduko parlamentariak deia egin die erakundeei eta alderdi politikoei "hitz politak alde batera utzi eta ekintzetara pasatzeko", emakumeek jasaten duten "desberdintasunari aurre egiteko".

EH Bilduk ekitaldi politikoa egin du Bilbon Emakumearen Nazioarteko Egunari buruz hausnartzeko. Agirrez gain, koalizio abertzaleko beste hainbat ordezkarik hartu dute parte: Oskar Matute eta Marian Beitialarrangoitia Kongresuko diputatuak, besteak beste.

Jasone Agirre legebiltzarkideak gogoratu duenez, legearen arabera, gizonek eta emakumeek eskubide berberak dituzten arren, batzuen eta besteen bizimoduak "desberdinak" dira.

Ondoren, emakume etorkinek, egoitzetako langileek, ikasle gazteek eta indarkeria matxistaren biktimek bizi duten egoeraz ohartarazi du. Halaber, "nahiz eta lanak berdinduko gintuela uste, guztiz kontrakoa gertatu da", azpimarratu du Agirrek.

Legerbiltzarkidearen aburuz, "norbere lanetik hasten da" egoera horren aurkako borroka, baina erakundeek ere "asko dute esateko eta egiteko". Horrrenbestez, "hitz politak alde batera utzi eta ekintzekin hasi behar dela" nabarmendu du, "ezinezkoa baita goizean elkarretaratze batean egotea, eta arratsaldean, berriz, aurrekontuak murriztea".

Azkenik, koalizio abertzaleak bat egingo du datorren martxoaren 8rako mundo osoan, eta, batez ere Euskadin, deitutako geldialdiekin eta mobilizazioekin, Emakumearen Nazioarteko Egunean.