Rajoy ANra bertaratu beharko da deklaratzeko Gurtel auzia dela eta

Mariano Rajoy Espainiako Gobernuko presidentea Auzitegi Nazionalera bertaratu beharko da uztailaren 26an, Gurtel auziagatik deklaratzera, auzi horretako epaimahaiak hala erabaki duelako.

“Hasieratik esandakoa errepikatuko dut. Auzitegiek hartutako erabakiaren esku nago”, esan du Rajoyk epaimahaiak hartutako erabakiaren berri izan ostean.

Hala, Auzitegi Nazionaleko bigarren sekzioaren gehiengoak (bi boto alde, bat aurka) PPk eta Rajoyk berak egindako eskaria ukatzea erabaki du, bideokonferentziaz deklaratzeko, baina proposatutako datak onartu dizkio.

Angel Hurtado epaitegiko presidenteak eman du kontrako botoa. Beste bien iritzian, aldiz, Rajoy ANra bertaratuta gertutasuna eta erantzuteko aukera ziurtatuta egongo litzateke eta, gainera, deklarazioa "normaltasun demokratikoaren baitan" kokatuta legoke.

Aurretik Jesus Santos PPren abokatuak bideokonferentziaz deklaratu beharko lukeela adierazi zuen "Gobernuko presidente karguaren jarduerari kalte txikiena egingo liokeen modua" hori dela iritzita.

PPren abokatuak azaldu zuenez, "herritar guztiei eragiten dien Estatu mailako kontua da Gobernuko presidentearen agendarena".