Ekonomia -
Energia berriztagarriak
RWE enpresak parke eoliko bat eraiki nahi du Bermeon, Bakion, Mungian eta Meñakan
19,8 MW-ko potentzia gordina duten hiru aerosorgailu izango lituzke parkeak. Orain, epe bat ireki da beste pertsona fisiko edo juridiko batzuek lehian eskabideak aurkez ditzaten.
Agentziak | EITB MEDIA
RWE Renewables enpresak Bizkaian parke eoliko bat eraikitzeko asmoa du, 19,8 MW-ko potentzia gordina duten hiru aerosorgailurekin, Bermeo, Bakio, Mungia eta Meñaka udalerriei eragingo liekeena.
Euskal Herriko Agintaritzaren Aldizkariak Bizkaiko Industriako lurralde-ordezkariaren iragarki bat argitaratu du asteazken honetan, parke hori eraikitzeko aurretiazko administrazio-eskaera jendaurrean jartzeko.
Orain, 20 eguneko epea irekiko da parke eoliko hori ezarri eta ustiatzeko interesa duten pertsona fisiko edo juridikoek lehiaketarako eskaerak aurkez ditzaten. Hasierako izapide bat da hau, leku horretan bertan proiektu bat eraikitzeko interesa duen inor dagoen jakiteko.