Emakume bat hil da Faltzesen izandako trafiko-istripu batean

64 urteko Tuterako emakume bat hil da gaur Faltzesen izandako auto-istripu batean. Gainera, beste bi pertsona zauritu dira, horietako bat larri.

Nafarroako Gobernuak ezagutzera eman duenez, bi autok aurrez aurre talka egin dute 09:51ak aldera NA-6100 errepideko 32. Kilometroan (Artederreta-Martzilla), Faltzes parean.

Ibilgailuetako batean hil den 64 urteko emakumea eta, zaurituta, Nafarroako Ospitalera eraman duten 74 urteko gizonezkoa zihoazen. Bigarren ibilgailuko gidaria, berriz, larri zauritu da eta helikopteroan eraman dute Nafarroako Ospitalera.

Tafallako eta Azkoiengo suhiltzaileak bertaratu dira istripuaren tokira eta autoen barruan harrapatuta gelditu diren hiru lagunak erreskatatu dituzte.

Foruzaingoak ikerketa abiatu du istripuaren nondik norakoak argitzeko.

Bestalde, 64 urteko emakumearen gorpua Nafarroako Auzitegi Medikuntzako Institutura eraman dute autopsia egin diezaioten.