Emakume bat hil da Iruñean, autobus batek harrapatuta

Emakume bat hil da Iruñean, Ezkaba auzoan, astearte goizean, autobus batek oinezkoentzako pasabide batean harrapatuta.

Oraindik zabaldu ez diren arrazoiak direla-eta, autobus batek 63 urteko emakume bat harrapatu du Kanalea kalean, 09:25ean. Biktima bizirik eraman dute Nafarroako Ospitalera, baina oso larri zegoen, eta bertan hil da, Iruñeko Udalak jakitera eman duenez.

Autobus gidaria ere ospitalera eraman behar izan dute, harrapaketaren ostean schok egoeran zegoelako. Iruñeko Udaltzaingoak azaldu duenez, autobus gidariari alkoholemia proba egin diote, eta negatibo eman du.

Udaltzaingoaren hiru patruila bertaratu dira istripua izan den tokira, eta zirkulazioa bideratzeaz gain, osasun langileentzako gune bat ezarri dute. Antsoaingo Udaltzaingoaren patruila bat ere joan da laguntzera, eta baita suhiltzaileak ere.