Gizartea -
INDARKERIA MATXISTA
4 urte eta erdiko kartzela-zigorra ezarri diote Dani Alvesi, Bartzelonan neska bat bortxatzeagatik
Auzitegiak, gainera, 5 urteko zaintzapeko askatasuna eta biktimarekiko 9 urte eta 6 hilabeteko urruntzea eta inkomunikazioa ezarri dizkio, baita 150.000 euroko kalte-ordaina eta kostuen ordainketa ere.
EITB MEDIA
Bartzelonako Auzitegiak 4 urte eta erdiko kartzela zigorra ezarri dio Dani Alves futbolariari, 2022ko abenduaren 30eko gauean Sutton diskotekako komunean neska gazte bat bortxatzeagatik.
Ostegun honetan jakinarazitako epaian, Auzitegiko 21. sekzioak Alves kondenatu du, urtebete baino gehixeago daramana prebentziozko espetxeratzean. Lau urte eta erdiko kartzela-zigorra, bost urteko zaintzapeko askatasuna eta biktimarekiko bederatzi urte eta erdiko urruntze-zigorra ezarri dizkio. Gainera, 150.000 euroko kalte-ordaina eman beharko dio sexu-erasoaren delituagatik. Fiskaltzak bederatzi urteko zigorra eskatu zuen, eta akusazio partikularrak, berriz, 12koa.
Epaiak kaltea konpontzeko aringarria aplikatzen du, eta ondorioztatzen du Alvesek "bat-batean" hartu zuela biktima, lurrera bota zuela, eta, mugitu ez zedla ziurtatuz, bortxatu egin zuela" egiaztatu dela, "salatzaileak ezetz zioen arren, joan egin nahi zuela".
Auzitegiaren arabera, "sexu-erasoa izateko ez da beharrezkoa lesio fisikorik izatea, ezta biktimak sexu-harremanak izatearen aurkako jarrera heroikorik izatea ere".
Auzitegiak "positiboki baloratu du biktimaren ahozko epaiketaren lekukoen deklarazioa, haren kontakizuna berresten duten beste froga batzuekin batera".
Bestalde, Ines Guardiola Alvesen abokatuak esan du apelazio-errekurtsoaren bidez helegitea aurkeztuko dutela eta jokalariaren errugabetasuna "amaierara arte" defendatuko duela.
