Mundua -
Auzipetutako lehen presidentea
New York, gotortuta istiluen beldur
AEBko presidente ohiak aurreratu duenez, fiskalak 33 kargu egotziko dizkio. Buruzagi errepublikanoaren aldeko eta kontrako mobilizazioak daude deituta, eta, badaezpada, polizia andana egongo da New York hiria zaintzen.
Agentziak | EITB Media
Donald Trump AEBko presidente ohiak gaur (18:15 GMT, 20:15ean Euskal Herrian) ezagutuko ditu Stormy Daniels auzian egozten dizkioten kargu guztiak. Daniels aktore pornoa da, eta harekin izandako sexu harremanak ezkutatzeko dirutza jaso omen zuen Trumpen abokatuaren eskutik. Buruzagi errepublikanoa atzo heldu zen New Yorkera. Hiria gotortuta du Poliziak, istiluak gertatuko diren beldur.
Trumpek bere sare sozialean goizaldean botatako mezu sorta batean adierazi duenez, Alvin Bragg Manhattan barrutiko fiskalak 33 kargu leporatuko dizkio. Trumpen hitzetan, "ez dago aldaketarik, ezta sorpresarik ere" egotzitakoen artean, eta "ez dut deliturik egin", berretsi du.
Joan den astean auzipetu zuten Trump, Stormy Daniels aktore pornoari 130.000 dolar (120.000 euro baino gehiago) ordaintzea egotzita. Horrenbestez, kargu kriminalei aurre egin beharko dien AEBko lehen presidente ohia izango da. Inputazioak kolokan jar lezake Etxe Zurirako aurkeztu asmo duen hautagaitza.
Presidente ohia epailearen aurrera eraman aurretik, manifestazioa deitu dute haren aldekoek (16:30 GMT, 18:30ean Euskal Herrian). eta bertan izango da Marjorie Taylor Green kongresista errepublikanoa. Mobilizazioa Collect Pond parkean egingo dute, Manhattango epaitegiaren aurrean. Trumpen kontrako elkarretaratzeak ere izango dira hiri horretan bertan.
Protestak liskartsuak izan daitezkeen beldur, Etxe Zuria prest da, zer gerta ere. New Yorkeko Poliziak erne egoteko deia egin die agente guztiei, barne ohar batean.
Behin karguak ezagututa, Trumpek agerraldia egingo du Palm Beachen (Florida hegoaldea, 00:15 GMT, 02:00etan Euskal Herrian) duen etxean.
