Koreako penintsula gerra nuklear baten atarian jartzea leporatu dio Ipar Koreak AEBri

Kang Sun-nam Ipar Koreako Defentsa ministroak Koreako penintsula gerra nuklear baten atarian jartzea leporatu dio Ameriketako Estatu Batuetako Gobernuari, eta baztertu egin du negoziazioek gatazka konpontzea.

"Urtearen hasieratik, AEBk arma nuklear estrategiko ugari helarazi dizkio Hego Koreari, tartean urpeko nuklear bat, bonba-ontzi estrategiko bat eta hegazkin-ontzi atomiko bat", esan du Ipar Koreako Gobernuaren ordezkariak Moskuko Nazioarteko Segurtasunerako XI. Konferentzian.

Horren arabera, "orain kontua ez da noiz hasiko den gerra nuklearra Koreako penintsulan, nork eta nola hasiko duen baizik".

Ipar Koreako agintariaren hitzetan, gaur-gaurkoz "ezinezkoa" da gatazka elkarrizketaren edo negoziazioen bidez konpontzea.

"AEBk Koreako Herri Errepublika Demokratikoaren aurkako politikaren erabateko porrota onartzen ez duen bitartean, eta gure errepublikarekiko antagonismo militarreko politika betiko uzten duen bitartean, ezinezkoa izango da edozein arazo elkarrizketaren edo negoziazioaren bidez konpontzea", ziurtatu du.

Gaur egungo baldintzetan, "indarraren erabilera da Koreako penintsulan bakea eta egonkortasuna mantentzeko modu bakarra", erantsi du.

Bi Koreen arteko tentsioa punturik gorenetako batean dago, Piongiangeko gobernuak iaz geroztik arma-saiakuntza ugari egin baititu, kontinente arteko misil balistiko sofistikatuenekin barne.