Mundua -
Ekialde Erdikoa
Siria eta Jordaniaren arteko mugan soldadu estatubatuarren aurkako erasoan parte hartu izana ukatu du Iranek
Teheranek dio ez dagoela "eskualdeko erresistentzia taldeen operazioetan" inplikatuta, AEBek eta Erresuma Batuak ziurtatu duten bezala. "Adierazpen horiek helburu politiko zehatzekin egiten dira eskualdeko errealitateak iraultzeko", gaineratu du.
Agentziak | EITB Media
Iranek ukatu egin du Sirian, Jordaniako mugan, hiru soldadu estatubatuar hil eta eskualdeko miliziek bere gain hartu duten droneekin egindako erasoan parte hartu izana, IRNA agentziak jakitera eman duenez.
Naser Kanani Irango Atzerri Ministerioko bozeramaileak adierazi duenez, bere herrialdea ez da inplikatuta egon "eskualdeko erresistentziako taldeen operazioetan", AEBk eta Erresuma Batuak ziurtatu dutenez.
"Adierazpen horiek helburu politiko zehatzekin egiten dira eskualdeko errealitateak iraultzeko, eta hirugarrenek eraginda, erregimen sionistak (Israel) eta haurren hiltzaileak, hain zuzen ere", esan du Kananik, IRNAk jasotzen duenez.
"Iran ez da sartzen Palestinako nazioa babesteko edo bere burua defendatzeko erresistentziako taldeen erabakietan", azaldu du Kananik Teheranen emandako prentsaurrekoan. "Eskualdeko erresistentzia taldeek ez dute Irango Errepublika Islamikoaren agindurik jasotzen", berretsi du.
Era berean, Irango Errepublika Islamikoak NBEn duen Misio Iraunkorrak azpimarratu duenez, "Iranek ez du loturarik ezta zerikusirik ere AEBko base baten aurkako erasoarekin".
"Eraso honen inguruko datuak biltzen ari bagara ere, badakigu Sirian eta Iraken lan egiten duten Iranen aldeko taldeek egin zutela", esan zuen Joe Biden AEBetako presidenteak ohar batean.
Al Nujaba miliziak, Irakeko Erresistentzia Islamikoaren garrantzitsuenetako batek, AEBk Sirian eta Iraken dituen posizioen aurka egindako hainbat eraso ospatu ditu, besteak beste, Siriako Al Tanf basearen aurka zuzendutako ekintza, "50 soldadu estatubatuar baino gehiago hil eta zauritu zituena".
Lehen aldia da Gazako Zerrendako gatazka areagotu zenetik soldadu estatubatuarrak hiltzen direla Irakeko miliziek egindako erasoen ondorioz; izan ere, AEBen posizioen aurkako 100 ekintza baino gehiago egin dituzte Iraken eta Sirian, borrokak hasi zirenetik.