Beñat Aginagalde absolbitu dute, froga faltagatik

Auzitegi Nazionalak Beñat Aginagalde Ugartemendia absolbitu du. Aginagalde Isaias Carrasco Arrasateko sozialisten zinegotzi ohia hiltzea leporatzen zioten. Hilketa 2008ko martxoaren 7an izan zen, urte hartako hauteskunde kanpainaren azken egunean.

Ostegun honetan aditzera emandako epaiaren arabera, ez dago Aginagaldek Carrascori tiro egin ziola frogatzen duen ezer. Fiskalak 32 urteko kartzela zigorra eskatzen zuen, hilketa terrorista, armak edukitzea eta kalteak eragitea argudiatuta.

Ekainaren 18an egindako epaiketan, Aginagaldek esan zuen atentatua gertatu zen momentuan EHUko Medizina fakultatean zegoela, anatomia patologiko ikasgaiaren azterketa bat egiten. Akusatuak azaldu zuenez, Hernaniko taberna batean bazkaltzen zegoela izan zuen, lehen aldiz, atentatuaren berri, telebistan ikusitako "albiste aurrerapen batean".

Auzitegi Nazionalaren arabera, Aginagalde hiltzailea zela esan zuten bi lekuko babestuen adierazpenak ez dira nahikoak akusatua erruduna dela esateko.

Hala ere, Beñat Aginagalde ez dute aske utziko, prebentzioko espetxeratzean jarraituko du, ETAko Asti komandoko kidea izatea leporatzen diotelako. Asti komandoa 2009an desegin zuten.

Argazki bat ez da nahikoa

Guillermo Ruiz Polanco, Angeles Barreiro (txostengilea) eta Antonio Diaz Delgado magistratuek epaian adierazi dutenez, "hilketa gertatu eta urtebetera" lekuko batek akusatua hiltzailea zela antzeman zuen argazki batean.

Lekuko horrek esan zuenez, hilketaren egunean, 13:25 aldera, pertsona bat ikusi zuen Navas de Tolosako atari batean, norbaiti itxaropen balego bezala. Ondoren, "petardoen hotsa eta Carrascoren alabaren oihuak" entzun zituen eta "lehengo gizonezkoa kaletik korrika" ikusi zuen.

Lekukoak susmagarriaren deskribapen fisikoa egin zuen, soinean zeramatzan arropak barne. Deskribapen hori bat zetorren bigarren lekukoak egindakoarekin. Bigarren lekuko horrek "pertsona bat zinegotzi ohiaren aurka tiro egiten" ikusi zuela esan zuen, baina ez zuen akusatua argazkian antzeman.

Tribunalaren arabera, argazkia da "akusatuaren kontrako frogaren oinarria", eta froga hori "ez da nahikoa", "argazkiari buruzko iritzi ezberdinek akusatuaren alde egiten dutelako".

Aginagalde 2010eko otsailan atxilotu zuten Cahan udalerrian, Frantzian, eta apirilaren 8an Madrilera eraman zuten Carrascoren kontrako atentatuagatik eta Iñaki Uriaren hilketagatik erantzuteko. Uria Azpeitian hil zuten, tiroz.

Carrasco bost tiroz hil zuten

Epaiak dioenez, Carrascoren hilketa atentatu terrorista izan zen, ETAk Gara egunkarian aldarrikatu zuelako. Carrasco etxetik atera eta autoan sartu zen martxoaren 7an, 2008ko hauteskunde orokorretako kanpainaren azken egunean.

Behin autoan sartuta, 43 urteko zinegotziak "bost tiro jaso zituen, 25 eta 30 urte arteko gizonezko batek egindakoak. Tiratzaileak 1,75 eta 1,80ko altuera zuen, eta 75-80 kiloko pisua. Gorpuzkera arrunta zuen, ile beltza edo marroia, egun gutxi batzuetako bizarra, laburra, zaindutakoa", eta "aurpegi luzea".

Tiro egiteko "identifikatu gabeko arma" bat erabili zuten. Hilketaren tokian jasotako arrastoen arabera, Txekiar Errepublikan egindako arma zen, Seller&Bellot etxekoa, 9 milimetrokoa. Isaias Carrasco erasoa jasan eta ordubetera hil zen, Arrasateko ospitalean.