Politika -
Auzitegi Gorena
Aske utzi dituzte Segiko zazpi gazte kondenatuetako bost
Fiskalak onartu egin du kondenak murriztea, egotzitako delituak ez direlako "hain larriak".
Agentziak | Erredakzioa
ETAko kide izatea egotzita Auzitegi Nazionalak 6 urteko espetxe zigorra ezarri zien Segiko zazpi kideetako bost aske geratuko dira, fiskalak onartu egin baitu kondenak murriztea.
Amaia Izko abokatuak Twitterren iragarri duenez, aske utziko dituzten gazteak hauek dira: Xabat Moran, Bergoi Madernaz, Marina Sagastizabal, Aiala Zaldibar eta Igarki Robles. Oraingoz ez dago albisterik beste bi kondenatuen inguruan (Ibon Esteban eta Ainhoa Villaverde).
Auzitegi Gorenak saio publikoa egin du gaur, Auzitegi Nazionalak zigortutako Segiko zazpi kideek aurkeztutako helegiteak aztertzeko.
Terrorismo delituetan, helburuaren eta erabilitako baliabideen "larritasuna txikiagoa" denean, zigorraren graduak bat edo bi gutxiago izatea aurreikusten du Zigor Kodearen azken erreformak, zigortuen abokatuek aretoan argudiatu dutenez.
"Hain larriak ez"
Gorenak, bere irizpideen arabera, zigorrak txikitzea onartu du fiskalak. "Horixe da, hain larriak ez diren hipotesi batzuen aurrean gaude, eta sala inguruabar horiek aintzat hartzeko burujabea da", esan du fiskalak.
Ministerio Publikoak, baina, ukatu egin du Auzitegi Nazionalak zigorrak frogarik izan gabe ezarri izana zigorrak.
Bestalde, zigortuak aske uzteko eskatu dute berriro abokatuek. Tratu txarrek atxiloaldian egindako aitorpenak baldintzatu zituztela salatu dute abokatuek, eta epailearen aurrean ez zituztela berretsi gogorarazi dute.
