Politika -
EUSKO LEGEBILTZARRA
Suhiltzaileen lege-proiektua atzera bota du Jaurlaritzak
Uztailaren 27an onartu zuen Gasteizko Gobernuak lege-proiektua, eta oposizioko talde guztiek osoko zuzenketak aurkeztu ondoren, atzera botatzea erabaki du.
AGENTZIAK |ERREDAKZIOA
Suteen Prebentzio eta Itzalketa eta Salbamendu Zerbitzuak Arautzeko Lege-proiektua atzera botatzea erabaki du Eusko Jaurlaritzak, "babes faltagatik". Oposizioko talde guztiek osoko zuzenketak aurkeztu zituzten lege-proiektua bertan behera uzteko eskatuz, profesionalen iritziak kontuan ez dituela hartzen argudiatuta. EH Bildu, PSE-EE, PP eta UPyD alderdien iritzian, hutsune larriak ditu proiektuak.
Jaurlaritzak, dagoeneko, eman die erabakien berri hiriburuetako udalei eta EAEko aldundiei, suhiltzaileen zerbitzuak euren esku baitaude.
Josu Erkoreka Jaurlaritzako bozeramaileak esan duenez , legea jorratzen hasi zirenean, erakunde guztien arteko adostasuna zegoen; EH Bilduk eta PPk baina, Gipuzkoa eta Arabako aldundietatik kanpo geratu zirenean, iritzia aldatu zutela esan du Erkorekak.
EAEn dauden 25 suhiltzaile-parkeen arteko koordinazioa arautzea eta bermatzea zen legearen helburua, Jaurlaritzaren hitzetan, lurralde bakoitzeko beharrak eta berezitasunak kontuan hartuta.
Sindikatuak eta langileak ere aurka izan ditu lege-proiektuak, hasieratik. Suhiltzaileek protesta ugari egin dituzte legearen kontra; beraien zeregin eta betebeharrak testu berrian ez zeudela behar bezala zehaztuta salatu dute, eta euren lan-baldintzak okertuko ziren beldur agertu dira.
