Zabalzaren arreba: 'Onartezina da murala kentzea agindu izana'

Mikel Zabalzaren arrebak "guztiz onartezina" eta "iraingarria" iritzi dio Espainiako Gobernu Ordezkaritzak Aoizen "tortura" hitza eta bere nebaren irudia irudikatzen duen murala kentzeko eskatu izana, "auzia argitzearen alde agertu beharrean".

“Ezin justifikatuzko justifikatu nahi da eta kontu hau nahastearen alde egin dute”, zehaztu du Idoia Zabalzak prentsaurreko batean. Prentsaurreko berean, Unai Lako Aoizeko alkateak aurreratu duenez, Udalak horma-irudia ez ezabatzea adostu du, bertan “delituzko ezer” ez dagoela ulertzen baitu.

Batak zein besteak salatu egin dituzte bai lehenengo eskaera (terrorismo goresten duen delituan ez erortzeko murala ezabatzea eskatzen zuena), bai bigarrena (lehenengoa bertan behera uzten zuena, baina Estatuko Segurtasun Indarren aurka egindako ustezko irainengatik horma-irudia ezabatzea eskatzen zuena ere).

Espainiako Gobernu ordezkaritzak Mikel Zabalza ETArekin loturarik izana ezeztatu ostean, haren arrebak erakunde horren titularra den Carmen Albari esan dio familiak berarentzat ere eskari bat duela: "Ardura berarekin jokatzea eta gure anaiaren auzia argitzeko beharrezkoak diren jardunbideak hartzea gustatuko litzaiguke".

"Estatuko segurtasun-indar eta –kidegoek galdetegietan erabili izan dituzten praktikak iker ditzala, zeren hori egiten badu, ondorioztatuko du muralean egiten den salaketa jardunbide hedatua izan zela eta erabat justifikatuta dagoela", baieztatu du.

Idoia Zabalzak nabarmendu duenez, “behin eta berriz” defendatuko dute bere neba ez zela ETAko kidea eta bere atxiloketaren ostean jasan zituen torturengatik hil zela.

Mikel Zabalzaren hilotza duela 30 urte agertu zen Bidasoa ibaian,  Guardia Zibilak atxilotu eta handik eta 20 egunera.

Hori dela eta, Gobernuko ordezkaria “gutxienez isildu egin beharko litzatekeela” uste du.