Politika -

EUROPAKO PARLAMENTUA

Gaixo larri dauden presoen egoera azaldu die Etxeratek eurodiputatuei

Josu Juaristi EH Bilduko europarlamentariak gonbidatuta, hainbat talde politikotako ordezkariekin bildu dira Bruselan presoen senideak.

Etxerateko ordezkariak, gaur, Europako Parlamentuan.
Etxerateko ordezkariak, gaur, Europako Parlamentuan.
Etxerateko ordezkariak, gaur, Europako Parlamentuan.

AGENTZIAK | ERREDAKZIOA

Whatsapp Facebook Twitter Telegram Email

Gaitz larriak dituzten euskal presoen egoera azaldu die Etxerat elkarteak Europako Parlamentuko hainbat talderi. Josu Juaristi EH Bilduko europarlamentariak gonbidatuta, hainbat talde politikotako ordezkariekin bildu dira, gaur, presoen senideak Bruselan. Osasun egoera larrian dauden presoak gero eta gehiago direla salatu dute, eta horien eskubideak bermatzeko, laguntza eskatu diete eurodiputatuei.

Parlamentuan bertan egin duten agerraldian, Juaristik adierazi du Espainiako eta Frantziako espetxeetan larriki gaixo dauden presoen egoera azaldu dietela Etxerateko ordezkariek eurodiputatuei. Juaristiren arabera, Espainiak eta Frantziak ez dituzte betetzen Europak gaixo dauden presoentzat ezarritako estandarrak.

2015eko martxoan ere Europako Parlamentuan izan ziren euskal presoen senideak, eta Urtzi Errazkin Etxerateko ordezkariak gogora ekarri duenez, bisita haren ondoren Europako Parlamentuko ordezkaritza bat Euskal Herrian izan zen, eta hainbat alderdi eta elkarterekin bildu ondoren, txosten bat osatu zuen presoen egoeraren inguruan.

Bruselara egiten ari diren bigarren bisita honen helburua "konpromiso berriak" eskatzea eta gaitz larriak dituzten presoen alde urratsak ematea dela esan du Errazkinek.

Etxeraten arabera, egun 22 preso daude gaixo larri. "Espainiako, Frantziako edota nazioarteko legeen arabera, kalean behar lukete", azpimarratu du Errazkinek.

Gaur eta bihar egingo dituzten bileretan, informazio guztia helaraziko diete europarlamentariei, eta presoen egoera hobetzeko Europak eskaintzen dituen aukerak aztertu nahi dituztela zehaztu du elkarteko bozeramaileak.

 

Hau zure interesekoa bada, baliteke beste gai hauek ere izatea
Politika albisteak Batasun europarra Europa bideoak Presoak argazkiak EH Bildu Gipuzkoa Eguneko albisteak Eguneko albisteak