Politika -
ERREAKZIOAK
Euskal sozialistek eta alderdi politikoek atsekabea adierazi dute Rodolfo Aresen heriotzagatik
PSE-EEk, EAJk, EH Bilduk, Ahal Duguk eta PPk Euskadiko Alderdi Sozialistako buruzagi historikoaren figura nabarmendu dute. Eneko Anduezak, Idoia Mendiak, Patxi Lopezek eta Denis Itxasok ez ezik, Iñigo Urkullu lehendakariak eta Arnaldo Otegik ere gogora ekarri dute.
EITB MEDIA
Rodolfo Aresen heriotzaren berri izan ondotik, alderdi politikoek bere figura nabarmendu dute.
PSE-EEk bere mina adierazteaz gain, besarkada handi bat bidali nahi izan dio bere familiari sare sozialetan argitaratutako mezu labur batean.
Eneko Andueza PSE-EEko idazkari nagusiak aitortu du "egun gogorra" dela "Euskal Sozialismoarentzat". Twitterren argitaratutako mezu batean azaldu duenez, "Euskadiren eta Espainiaren historia ulertzeko funtsezko pieza" izan da.
Idoia Mendia PSE-EEko idazkari nagusi izandakoak nabarmendu du Euskadi "kohesionatu, progresista eta librea" eraikitzeko lan egin duela eta euskal sozialismoa ulertzeko ezinbesteko zutabe izan dela gaineratu du.
Patxi Lopez lehendakaria "atsekabetuta" agertu da bere lagunaren heriotzagatik. Pertsona "erresistente ordezkaezin" gisa gogoratu du eta Euskadi eta Espainia berarekin "zorretan" daudela gaineratu du.
Iñigo Urkullu lehendakariak atsekabea agertu du eta doluminak eman dizkie haren familiari, lagunei, Euskadiko Alderdi Sozialistari eta alderdikideei sare sozialetan zabaldutako mezu batean. Iñigo Urkulluk azpimarratu duenez, "terrorismoaren aurkako borrokan ezinbesteko lana egin zuen, bere bizitza arriskuan jarriz".
PSE-EEko buruzagi historikoaren heriotzaren aurrean samina eta atsekabea adierazi ditu EAJk sare sozialetan zabaldutako mezu batean, eta doluminak eman dizkie hildakoaren senideei eta alderdikideei. EAJk nabarmendu du "Trantsiziotik euskal sozialismoaren erreferente" izan zela.
Arnaldo Otegi EH Bilduko koordinatzaile nagusiak doluminak eman dizkie familiari, lagunei eta PSE-EEko kideei. Ezker abertzaleak sozialistekin ETAren amaierarako egindako negoziazioetan berarekin "elkarrizketa zintzoa" izan zuela adierazi du.
Maddalen Iriarte EH Bilduko Eusko Legebiltzarreko bozeramaileak koalizio abertzalearen doluminak helarazi dizkie senide eta lagunei eta "PSE-EEren familia politikoari". Eusko Legebiltzarrean EH Bilduko talde parlamentarioarekin bilera egin ostean eskaini duen prentsaurrekoan hitz egin du Maddalen Iriartek.
Podemos Euskadik ere Eusko Jaurlaritzako Herrizaingo sailburu ohi eta PSE-EEko buruzagi historikoaren heriotza deitoratu du.
Carlos Iturgaiz Euskadiko Rodolfo Aresen heriotza deitoratu du, eta azpimarratu du "arrastoa" utzi zuela "euskal politikan". Sare sozialetan zabaldutako mezu batean, Iturgaitzek doluminak eman dizkie euskal sozialistei.
Bestalde, Pedro Sanchez Espainiako Gobernuko presidente eta PSOEko idazkari nagusiak nahigabea adierazi du Rodolfo Ares "euskal sozialismoaren kide historikoaren" heriotzagatik, eta nabarmendu du "ETAren amaieraren alde eta bakearen, askatasunaren eta bizikidetzaren alde ausardiaz lan egin zuen zerbitzari publikoa" izan zela.
Denis Itxaso Espainiako Gobernuak EAEn duen ordezkariaren esanetan, terrorismoaren aurkako borrokan "paper erabakigarria" izan zuen eta gazteenganako erakutsi zuen "maitasun amaigabea" goraipatu du Twitteren zabaldutako mezu batean.
