Albisteak
Ostegunean
Jesus Eguiguren, Sanchezen gobernualdiaz, 'Faktoria'n
ERREDAKZIOA | G.U.
Gainera, Euskal Herrira bakarrik irristen diren adingabeko atzerritarren gaiari helduko diogu, eta Hack Center egitasmoaren berri emango dugu.
Jesus Eguiguren PSEko lehendakari ohiaren laguntzarekin egingo du ostegun honetako 'Faktoria'k Pedro Sanchezek osatu duen gobernuari buruzko irakurketa. Bestalde, 09:30etatik aurerra, berriz, Euskal Herrira bakarrik iristen diren adin txikiko atzerritarrei buruz arituko gara. Zenbaki zehatzik ematea zaila bada ere, 600dik gora dira gurean eta, horien artean, gehienak, Bizkaian daude. Errealitate horrek dituen zailtasunei eta erronkei buruz arituko dira eta, profesionalen hitzetan ezagutuko dugu, atzerritar gazte horientzat euskal erakundeek hemen eskaintzen duten babes sareak nola funtzionatzen duen. Bestalde, Hack Center egitasmoaren berri jasoko dugu. Hernaniko Oronaren egoitzan nazioarteko 50 aditu (medikuak, zientzialariak…) elkartuko dira minbiziaren aurkako ikerketa datathoi batean.
07:00etan hasiko da saioa, Iñigo Alustizaren gidaritzapean. 07:50 aldera, Maite Artolak hartuko du lekukoa, eta Aingeru Epaltzaren sinadura entzungo dugu. 08:30ean, Nerea Azurmendi, Martxelo Otamendi eta Joseba Arruti izango ditugu solasaldian, aktualitateari errepasoa egiten, eta, tarte horretan hitz egingo dugu Jesus Eguigurenekin. 09:30ak aurretik, Ibon Sarasolaren euskara gomendioa entzungo dugu, eta, ondoren, Euskal Herrira bakarrik etortzen diren adingabeez ariko gara.
10:00etan, magazina jarriko du martxan Manu Etxezortuk. Hasteko, Amaia Artetxe lankidea Arriagan izango da, Kresala-ren irakurraldi jarraituan. Ondoren, Iruñeko baluarteren balio arkitektonikoaz ariko zaigu Mireia Roca, eta, 10:30ean, Hack center egitasmoaz hitz egingo dugu. Segidan, Filosofiaren historia gaurkotua ekarriko digu Markos Zapiainek.
11:00etako kirol aurrerapenaren ondoren, Mikel Chamizo musika konposatzaile eta kazetariren tartea izango dugu, eta Euskal Heriko orkestra denboraldiaren amaieraz ariko zaigu. 11:30ean, Arriagako giroa ekarriko digu berriz ere Amaia Artetxe lankideak.
12:00etan Azkoitiko gitarra elektriko egileen bilkura ezagutuko dugu, Joseba Izagirre, Iker Otegi eta Ander Zubillaga gitarra egileen eskutik, eta, 12:30ean, Alkoholiko Anonimoen 83. urteurrenaren atarian, Donostiako Karmelo ikastetxean antolatu duten hitzaldiari buruz hitz egingo digu AAko kide batek.
10:00etatik 13:00etara izango da martxan 'Faktoria'.
