Txirrindularitza
World Tourra
Eroriko larria gertatu da Poloniako Tourreko lehen etapan
AGENTZIAK | ERREDAKZIOA
Fabio Jakobsenek hesien aurka jo du Dylan Groenewegen herrikidearekin garaipenaren lehian zebilela. Groenewegenek gurutzatu du helmuga lehen postuan, baina deskalifikatu egin dute gerora.
-
Erorketa larria 2020ko Poloniako Tourreko lehen etapako azken esprintean. Argazkia: EFE
Chorzów eta Katowice artean (195 kilometro) lehiatu den Poloniako Itzuliko lehen etapa eroriko larri batekin amaitu da asteazken honetan, txirrindulariak azken esprintean bete-betean murgilduta zeudela.
Dylan Groenewegen (Jumbo-Visma) eta Fabio Jakobsen (Deceuninck-Quick-Step) garaipenaren bila zebiltzan nor baino nor gehiago esprintaren eskuin aldetik. Alabaina, une batean, lehenengoak eskuinerantz egin du eta Jakobseni bidea oztopatu dio. Deceuninceko txirrindulariak hesien aurka egin du talka, eta aurretik eraman du helmugan kokatuta zegoen argazkilari bat ere.
Groenewegenek ere erorikoa jasan du jarraian, baina bera sartu da helmugan lehendabiziko tokian izan da. Hala ere, geroago, epaileek lasterketatik bota dute, istripua hark eragin duela iritzita. Hartara, Jakobsen izan da etaparen garailea.
Jakobsen, koma induzituan
TVP Sport Poloniako telebista kate publikoak jakitera eman duenez, "hainbat medikuk" larrialdiko arreta eman behar izan diote Jakobseni helmugan bertan, eta "intubatuta eta koma induzituan" eraman dute ospitalera.
Gertatutakoaren aurrean, UCIk (Txirrindularitzaren Nazioarteko Batasuna) oharra argitaratu eta "gogor gaitzetsi" du Groenewegen portaera, "onartezina" izan dela iritzi baitio. Horrez gain, Jakobsen eta gainerako zaurituei babesa eskaini die.
From everyone at the UCI, our thoughts are with those injured in today’s crash at @Tour_de_Pologne in particularly @FabioJakobsen who is in a severe condition.
— UCI (@UCI_cycling) August 5, 2020
Our full statement can be read here ¿ https://t.co/s1BpSyXTM1
Jumbo-Vismak ere beste ohar bat plazaratu du barkamena eskatuz: "Gure pentsamenduak Fabio Jakobsenekin eta Poloniako Itzulian izandako istripu izugarrian nahasita dauden gainerako beste pertsonekin daude. Hauek bezalako istripuak ez lirateke gertatu behar. Barkamena eskatzen dugu eta gertatu dena eztabaidatuko dugu beste edozein adierazpen egin baino lehen".
Our thoughts go out to Fabio Jakobsen and other people involved in today’s terrible crash in the Tour of Poland. Crashes like these should not happen.
— Team Jumbo-Visma cycling (@JumboVismaRoad) August 5, 2020
We offer our sincere apologies and we will discuss internally what has happened before we may make any further statement. #TDP20
Bost etapa dituen World Tourreko lasterketak izen handiak ditu parte-hartzaileen artean: Remco Evenepoel (Deceuninck-QuickStep), Burgosko Itzulian erakustaldia eman duena; Wout Poels (Bahrain McLaren), Simon Yates (Mitchelton-Scott), Jakob Fuglsang (Astana) eta Richard Carapaz (Team Ineos), Giroko egungo txapelduna.
