Txirrindularitza
5. etapa
Vinek irabazi du Down Under Tourra, eta Pello Bilbao hirugarren izan da
EITB Media
Bosgarren eta azken etapan Simon Yatesek bereganatu du garaipena. Jay Vinek lidertzari eutsi dio, helmuga bigarren postuan gurutzatuta. Pello Bilbao zazpigarren izan da, eta sailkapen nagusiko hirugarren postuan amaitu du lasterketa.
-
Jay Vine, Down Under Tourreko irabazlea. Argazkia: EFE
Jay Vine (UAE) da 2023ko Down Under Tourreko irabazlea. Australiarra bigarren izan da azken etapan (5. etapa), eta sailkapen nagusiko lehen postuari eutsi dio.
Etapa garaipena Simon Yatesek (Jayco AlUla) bereganatu du, eta Ingalaterrako txirrindulariak sailkapen nagusiko bigarren postuan amaitu du lasterketa. Podiuma Pello Bilbaok (Bahrain-Victorious) osatu du, Down Under Tourra hirugarren postuan amaituta; Gernika-Lumokoa zazpigarren izan da azken etapan. Bilbaok hirugarren etapa irabazita eta sailkapen nagusian hirugarren izanda itxi du Down Under Tourra.
Unleyn hasi eta Mount Loftyn (112,5 km) bukatu den etapak erabaki du Down Under Tourra. Lasterketa irabazteko faboritoen arteko lehia bizia izan da, eta, azkenean, Simon Yatesek poltsikoratu du garaipena, azken metrotan Jay Vine mendean hartuta. Bi segundo beranduago gurutzatu du helmuga Ben O'Connorrek (AG2R Citroën). Pello Bilbao zazpigarren izan da irabazlearekiko sei segundora. Bizkaiko txirrindulariaren taldetxoan helmugaratu da Gorka Izagirre ere, 13. postuan.
Sailkapen nagusian Jay Vine Down Under Tourreko irabazleak 11 segundo atera dizkio bigarren izan den Simon Yatesi, eta 27 segundo hirugarren postuan bukatu duen Pello Bilbaori. Gorka Izagirrek bederatzigarren postuan amaitu du lasterketa, irabazlearekiko 1'13"ra.
5. etapako sailkapena:
1 - YATES Simon (Jayco) 2:41:16
2 - VINE Jay (UAE) d. b.
3 - O'CONNOR Ben (AG2R) + 2"
4 - TIBERI Antonio (Trek) + 3"
5 - BYSTRØM Sven Erik (Intermarche) + 6"
6 - HINDLEY Jai (BORA) d. b.
7 - BILBAO Pello (Bahrain) d. b.
8 - ALEOTTI Giovanni (BORA) d. b.
9 - SHEFFIELD Magnus (INEOS) d. b.
10 - SCHMID Mauro (Soudal) d. b.
-------------------------------------------------
13 - IZAGIRRE Gorka (Movistar) d. b.
Sailkapen nagusia:
1 - VINE Jay (UAE) 16:07:41
2 - YATES Simon (Jayco) + 11"
3 - BILBAO Pello (Bahrain) + 27"
4 - SHEFFIELD Magnus (INEOS) + 57"
5 - SCHMID Mauro (Soudal) + 58"
6 - O'CONNOR Ben (AG2R) + 1'04"
7 - BYSTRØM Sven Erik (Intermarche) + 1'06"
8 - TIBERI Antonio (Trek) + 1'07"
9 - IZAGIRRE Gorka (Movistar) + 1'13"
10 - COQUARD Bryan (Cofidis) + 1'13"
