Hugo Aznar Kern Pharma taldeko txirrindularia izango da datorren denboralditik aurrera

Kern Pharmak Hugo Aznar fitxatu du 2026ra arte, taldeak jakinarazi duenez. Horrenbestez, txirrindulari nafarra profesional mailan lehiatuko da 2024tik aurrera.

Hugo Kern Pharmaren bigarren taldean aritu da, Finisher izenekoan, eta, orain, lehen taldean arituko da, Unai bere anaiarekin batera.

Hugo Aznarrentzat (2003, Cortes) nahikoak izan dira bi denboraldi 23 urtez azpiko mailan Kern Pharma taldera iristeko. Urte horietan, nafarrak bost garaipen lortu ditu, Nafarroako Itzulia barne.

"Uste dut etorkizuneko txirrindularia izan naitekeela, eta badakit gauza asko ditudala hobetzeko. Oso ondo molda naiteke Kern Pharman. Asko ikastea, aurrera egitea eta ahal dudan guztian laguntzea espero dut", esan du Hugo Aznarrek Kern Pharmarekin kontratua sinatu ostean.

Unai anaiaren talde berean aritzeari buruz galdetuta, honakoa adierazi du: "Beti izan da bion ametsa talde berean aritzea, horixe izan da beti nahi izan dudana".