Txirrindularitza
Espainiako Vuelta
Evenepoelek erakustaldia eman eta La Cruz de Linaresen irabazi du, eta Kussek 17 segundoko aldea du orain
EITB MEDIA
Soudal Quick-Step taldeko txirrindulari belgikarrak modu ikusgarrian irabazi du 2023ko Espainiako Vueltako azken goi mailako mendiko etapan; izan ere, bakarka helmugaratu da, eta bederatzi minutu baino gehiagoko aldea atera die sailkapen nagusirako lehian ari diren ziklistei.
Albisteak (5)
- Roglicek irabazi du Anglirun, Vingegaarden aurretik, eta Kussek zortzi segundogatik eutsi dio maillot gorriari
- Vingegaardek irabazi du Bejesen, eta 29 segundora du maillot gorria; Sepp Kussek lider jarraitzen du
- Rui Costak irabazi du Lekunberrin, ihesaldiko indartsuena izanda, eta Sepp Kussek maillot gorriari eutsi dio
Soudal Quick-Step taldeko Remco Evenepoel txirrindulari belgikarrak irabazi du, ostegunean, 2023ko Espainiako Vueltako hamazortzigarren etapa, La Cruz de Linares mendate gogorrean, gogoan izateko moduko erakustaldia emanda. Evenepoel bakarka helmugaratu da, eta bederatzi minututik gorako aldea atera die sailkapen nagusirako lehian ari diren ziklistei. Sailkapen nagusiari dagokionez, Jumbo-Vismako Sepp Kuss estatubatuarrak bederatzi segundoko aldea atera dio etapan Jonas Vingegaard taldekideari, eta, hortaz, 17 segundora du orain sailkapen nagusiko bigarrena. Hiru etapa gelditzen dira bukatzeko, horietako bat mendikoa, larunbatekoa hain zuzen ere.
Ostegunean lorturikoa zenbatuta, Evenepoelek hiru etapa garaipen ditu, oraingoz, Espainiako Vueltako aurtengo ekitaldian, mendiko sailkapenaz gain, eta azken hori irabazita du jada. Gazte belgikarra 2022ko Espainiako Vueltan gailendu zen, eta udaberrian, maiatzean, Italiako Giroko lider zela, lasterketa utzi behar izan zuen, covid-19a atzemateko proban positibo eman ostean. Ostiralean, Tourmaleten, sailkapen nagusian zituen aukera guztiak galdu zituen, eta biharamunean iragarri zuen "beste modu batera" lehiatzeko asmoa zuela; bada, ordutik dabil helburu hori gauzatzen eta zaleei ikuskizun bikaina eskaintzen. Soudaleko ziklista egunero-egunero ari da erakusten ez duela ezer gorde nahi, eta anbizioz betetako lasterketa ari da egiten.
Esanguratsua izan da, halaber, zer jazo den Espainiako Vueltako aurreneko hiru sailkatuen artean. Jonas Vingegaardek, asteazkenean, gertu izan zuen Sepp Kussek zortzigarren etapatik soinean daraman maillot gorria; osteguneko etapan, aldiz, Kussek kontraerasoa egin du, azken kilometroan, eta bederatzi segundo gehiago atera dizkio danimarkarrari. Vingegaardek eta Primoz Roglicek ez dute mugimendurik egin, lasterketa buruan jarraitzeko ez bada. Ematen du Kuss dela Jumbo-Vismako apustua Espainiako Vuelta hau irabazteko; hala gertatuz gero, Herbehereetako taldeak hiru lasterketa handiak (Italiako Giroa, Frantziako Tourra eta Espainiako Vuelta) irabaziko ditu denboraldi berean, eta, gainera, txirrindulari batek lortuko du garaipena proba bakoitzean: Roglicek Giroa, Vingegaardek Tourra eta Kussek Vuelta.
Etapako ibilbidean, 3. mailako mendate bat zegoen, Tenebredo; 2. mailako beste bat, Las Estacas, eta 1. mailako bi, San Lorenzo eta La Cruz de Linares. Azken hori, gainera, bi aldiz igo behar izan dute txirrindulariek. Borrokatzeko eta bizi-bizi aritzeko aukera ematen zuen, eta ziklistek segituan erakutsi dute hori; izan ere, aurreneko kilometroetan sortu da eguneko ihesaldia. Talde handia sartu da bertan, 14 txirrindulari, eta maila handiko gizonak zeuden tartean. Movistarreko Imanol Ervitirekin batera, hauek sartu dira ihesaldian: Remco Evenepoel (Soudal Quick-Step), Egan Bernal (INEOS Grenadiers), Damiano Caruso (Bahrain-Victorious), Julien Bernard (Lidl-Trek), Lewis Askey eta Lorenzo Germani (Groupama-FDJ), Nico Denz (BORA-hansgrohe), Jarrad Drizners eta Andreas Kron (Lotto Dstny), Andrea Piccolo (EF Education-EasyPost), Max Poole (DSM-Firmenich), Hugo Hofstetter (Arkea Samsic) eta Paul Ourselin (Total Energies). Kalitate handiko ziklistak.
Gizon horiek alde handiak lortu dituzte; tropela ez omen zegoen horiekin kezkatuta, eta iheslariek hori baliatu dute tartea handitzeko. San Lorenzon, helmugarako 100 kilometro baino gutxiago falta zirenean, hamar minutuko aldea zuten, eta tarte bera zuten Tenebredo igotzen hasi direnean. Evenepoel aurrenekoa izan da Las Estacasen eta San Lorenzon, eta matematikoki ziurtatu du Madrilen, Espainiako Vuelta bukatuta, mendiko maillota jantziko duela.
Tenebredon, Evenepoelek erritmo gogorra jarri du, eta asko murriztu du aurreko taldea. Soudaleko belgikarrarekin batera, Carusok, Kronek, Poolek, Ourselinek eta Bernalek eutsi diote; gainerako zortziek, aldiz, ez dute 2022ko Espainiako Vueltako txapeldunarekin batera jarraitzerik izan. Evenepoelek garaipena nahi zuen, La Cruz de Linaresen 2023ko ekitaldian hirugarren etapa poltsikoratzeko. Andrea Piccolo eta Julien Bernard handik gutxira batu dira lasterketaren buruan zihoan seikotera. Hamaika minutu baino gehiagoko aldea zutenez, argi zegoen garaipena bertan zegoela, aurreko taldean.
La Cruz de Linareseko aurreneko igoeran, Remco Evenepoelek berehala egin du hautaketa; segituan gelditu da Poolerekin eta Carusorekin bakarrik, baina horiek ere utzi ditu atzean handik gutxira, malda gogor batean. Soudaleko liderra biziki indartsu zihoan, ausart ari zen igotzen. Begi-bistakoa zirudien garaipena eskura zuela.
Atzetik, Mikel Landaren Bahrain-Victorious taldea tropeleko buruan jarri da orduan, Murgiako txirrindulariak Juan Ayuso gainditu eta sailkapen nagusiko laugarren postua eskuratzea helburu. Anglirun ere jazo zenez, Antonio Tiberi jarri da tropeleko lehen postuan, erritmo bizia ezartzeko. Aurrealdean, bitartean, Evenepoel ezin hobeto zihoan garaipenaren bila.
La Cruz de Linareseko bigarren igoeran, etapako garaipenean baino interes gehiago zegoen atzealdean, faboritoen taldean; izan ere, Evenepoelek argi zuen garaipena berea izango zela. Kussek aukera baliatu du, eta hurbilago du azken maillot gorria. Mikel Landa (Bahrain-Victorious) bosgarren dago, eta baliteke larunbatean ere saiatzea, azken-aurreko etapan. Oraingoz, ostiralean, hemeretzigarren etapa jokatuko dute, La Bañeza eta Iscar artekoa, eta esprinterrentzat aukera bikaina izan liteke.
ETAPAKO SAILKAPENA:
1 - EVENEPOEL Remco (Quick Step) 4:47:37
2 - CARUSO Damiano (Bahrain) +4:44
3 - KRON Andreas (Lotto) +5:10
4 - POOLE Max (DSM) +5:12
5 - OURSELIN Paul (TotalEnergies) +5:17
6 - BERNARD Julien (Trek) +6:11
7 - BERNAL Egan (Ineos) +7:01
8 - AYUSO Juan (UAE) +9:29.
9 - MAS Enric (Movistar) d. b.
10 - KUSS Sepp (Jumbo) d. b.
12 - LANDA Mikel (Bahrain) +9:32
SAILKAPEN NAGUSIA:
1 - KUSS Sepp (Jumbo) 65:31:27
2 - VINGEGAARD Jonas (Jumbo) +0:17
3 - ROGLIC Primoz (Jumbo) +1:08
4 - AYUSO Juan (UAE) +4:00
5 - LANDA Mikel (Bahrain) +4:19
6 - MAS Enric (Movistar) +4:30
7 - UIJTDEBROEKS Cian (BORA) +7:37
8 - VLASOV Aleksandr (BORA) +8:35
9 - ALMEIDA Joao (UAE) +10:20
10 - BUITRAGO Santiago (Bahrain) +12:20
