Frantziako Tourra 2023
Osasun-txostena
Ion Izagirrek hautsita ditu eskuineko lepauztaia eta eskua
Erredakzioa
Tourreko 11. etapan eroriko latza izan ostean, lasterketa utzi behar izan du. Hausturez gain, josi egin diote kokotsa, baita masaila ere.
Ion Izagirrek (Astana) Tourra utzi behar izan du asteazken honetan, 11. etapan eroriko latza izan ostean. Taldeak jakinarazi duenez, euskal txirrindulariak hautsita ditu eskuineko lepauztaia eta eskuin eskuko hirugarren metakarpo-hezurra.
"Gure txirrindulariak haustura du eskuin lepauztaian eta eskuin eskuko hirugarren metakarpo-hezurrean. Gainera, josi egin behar izan diote kokotsa, baita masaila ere. Ionek gaua ospitalean pasatuko du, medikuen zaintzapean", adierazi du Astanak.
Euskal txirrindularia erori egin da 11. etapan, helmugarako 30 kilometro falta zirenean, eta horma baten aurka jo da Lavausseau herrian.
