Frantziako Tourra 2023
EPAIMAHAI TEKNIKOAREN ERABAKIA
Tourrak "ohartarazpen ofiziala" egin dio Pello Bilbaori "portaera desegokiagatik"
EITB MEDIA
Bahrain taldeko euskal txirrindulariak bere ibilbidean gurutzatu zitzaion ikusle bat kolpatu zuen hamazazpigarren etapan, La Loze mendateko igoeran.
-
Pello Bilbao
Frantziako Tourreko 17. etapa jokatu ondoren, zeinetan Jonas Vingegaardek, ezbeharrik ezean, erabakita utzi zuen lasterketako azken garaipena Tadej Pogacarren kaltetan, probaren antolakuntzak lasterketako komisarioen erabakiak eman zituen jakitera.
Zigorren artean Pello Bilbao Gernikako txirrindulariari dagokion bat ageri da. Bertan irakur daitekeenez, lasterketako epaimahaiak "ohartarazpen ofiziala" egiten dio Bahraingo kideari, "ikusle batenganako portaera desegokiagatik".
Izan ere, La Loze mailaz kanpoko mendatearen azken kilometroen igoeran, Bahrain taldeko euskal txirrindulariak ikusle batekin topo egin zuen ibilbidean, eta, ondorioz, erritmoa moteldu behar izan zuen. Horren aurrean, Bilbaok, edizio honetan etapa bat irabazi duenak, aipatutako zaleari kolpe bat eman zion besoarekin, hura baztertu eta David Gaudu frantziarraren arrastoa ez galtzeko.
