Artea
Guggenheimen 25.urteurrena
Guggenheim Museoak eta BOSek kontzertu berezi bat eskainiko dute beren urteurrenetarako
AGENTZIAK | EITB MEDIA
Kontzertua ekainaren 18an izango da museoaren atrioan, eta sarrera doakoa izango da.
-
Museoak bere 25. urteurrena, eta BOSek bere mendeurrena ospatuko dute. Argazkia: Guggenheim Museoa.
Guggenheim Bilbao Museoak eta Bilbao Orkestra Sinfonikoak (BOS) elkarrekin doako kontzertu bat eskainiko dute ekainaren 18an, museoaren atrioan. Guggenheimek bere 25. urteurrena, eta BOSek bere mendeurrena ospatuko dute.
Kontzertuan Modest Mussorgskyren "Erakusketa bateko margolanak" suitea joko dute. Mussorgsky konpositore errusiarrak Viktor Hartmann lagunaren omenez idatzi zuen obra hori, eta jatorrian pianorako konposatu bazen ere, Maurice Ravelek orkestrazio batez "koloreztatu" zuen.
Klasiko handi horrekin batera, Augusta Holmès frantziarraren Andromeda obra eskainiko dute kontzertuan.
Sarrerak eskuragarri egongo dira museoko txarteldegian edo bere webgunean maiatzaren 26ko 11:00etatik aurrera. Toki kopuru mugatua izango da.
Kontzertu berezia Guggenheim Museoaren 25. urteurreneko ekitaldien barruan sartzen da. Museoak 2022 zehar jarduera artistikoak eta kulturalak eskainiko ditu, "Artea etorkizunerako inspirazio" lelopean.
