Itxi

Bertsolaritza

Txapelketak

Udazkenean egingo dituzte Bizkaiko eta Nafarroako txapelketak eta Xilaba

N. V. | EITB Media

Xilabaren finala azaroaren 13an izango da, Nafarroako txapelketako azaroaren 27an eta Bizkaikoa abenduaren 18an.

  • Bertsolaritza

    Egutegi zehatzak aurrerago iragarriko dituzte. Argazkia: Alberto Elosegi / XDZ

Bizkaiko Bertsolari Txapelketa eta Xilaba amaitu gabe utzi zituzten iaz, pandemiaren ondorioz, eta Nafarroakoa hasi ere ez zen egin. Orain, egoeraren bilakaera ikusita, Bertsozale Elkarteak iragarri du 2021eko udazkenean egingo dituztela txapelketa horiek.

Zortzina saio izango dituzte Xilabak eta Nafarroako Bertsolari Txapelketak, eta hamar Bizkaikoak. Hartara, kasu bakan batzuetan egun berean izango dira zenbait saio, baina antolatzaileek eginahalak egingo dituzte "zaleei haien jarraipena errazteko".

Xilaba irailaren 18an hasiko da berriro, eta finala azaroaren 13an egingo dute.

Bizkaiko Bertsolari Txapelketa, aldiz, urriaren 3an hasiko da, eta abenduaren 18an ezagutuko dugu txapelduna.

Nafarroan, urriaren 2an ekingo diote Nafarroako Bertsolari Txapelketari, eta azaroaren 27an izango finala.