Musika
Kontzertua
Goran Bregovicek Baluarten taularatuko du bere balkandar unibertsoa
Agentziak | Erredakzioa
"Ezkontza eta Hileten Bandak" lagunduta, igandean joko du Iruñean. Sarreren prezioa 18 eta 32 euro artekoa da.
-
Goran Bregovic igandean izango da Iruñean. Argazkia: Nebojsa Babic.
Goran Bregovicek, “Ezkontza eta Hileten Banda” lagun, “Champagne for gypsies” bere azken lana aurkeztuko du igandean, hilak 3, 19:00etatik aurrera, Iruñean, Baluarte Fundazioaren denboraldiaren barruan.
Sarrerak ohiko bideetatik lor daitezke, 18 eta 32 euro arteko prezioan. Gainera, Gazte Txartela daukatenek 5 euroan erosi ahalko dituzte txartelak 3. gunean, ostiraletik aurrera, betiere, noski, guztiak bukatuta egon ezean.
Serbiar musikariak ijitoen doinuak berreskuratzeko lanean jarraitzen du, serbiar odisea zabaltzen, “Ezkontza eta Hileten” orkestra ondoan duela.
Azken bi diskoetan, “Alkohol” eta “Champagne for gypsies”en, are nabarmenagoa da jai giroa, bozkariorako deia. “Ijitoen garaia” Emir Kusturicaren filmaren soinu bandan debuta egin zuenetik, Bregovic ikonoa da, eta munduko hamaika agertokitan jaso dituzte dagoeneko bere zuzenekoen soinu eztanda. Europa ekialdeko kulturen uztarketa eramango du nafar hiriburuko aretora artista balkandarrak.
Bregovicen gitarra eta konponketak gidari, orkestran bulgariarren ahotsak, metal tresnen fanfarrea eta bonbo ezinbestekoa daude orkestran, soinu tradizionalak gaur egunera ekartzeko.
