Musika
20. urteurrena
Max eta Igor Cavalerak ‘Roots’ diskoa joko dute Bilbon, azaroan
N.V. | eitb.eus
Sepultura brasildar taldearen sortzaileek bira egingo dute, “Roots” diskoaren hogeigarren urteurrenean lan hori osorik joz ospatzeko.
Max eta Igor Cavalera Sepultura metal taldearen sortzaileek “Roots” diskoa osorik joko dute hainbat kontzertutan, “Return to Roots” biran, lanaren hogeigarren urteurrena ospatzen den urtean.
Hain zuzen, bira horrek geldialdia egingo du Bilbon, azaroaren 5ean, Santana 27 aretoan.
Amorrua eta erritmo tribalak, metala aldatzeko
“Roots” diskoak mugarria ezarri zuen Sepulturaren ibilbidean eta, oro har, metalean, brasildar sustraiak -Carlinhos Brown artistak parte hartzen du, esaterako- eta aurreko diskoetan erakutsita zeukaten thrash metal zakarra nahasi baitzituen taldeak bertan. Bi milioi ale baino gehiago saldu zituzten disko horrekin.
Cavaleratarrek Marc Rizzo gitarrista eta Johny Chow baxu-jotzailea izango dituzte lagun, Soulflyren eta Cavalera Conspiracyren garaietako lagun zaharrak.
Sarrerak salgai daude dagoeneko, 27,5 euroan.
