Sustraiez blai egingo dute larunbatean Ordizian

Munduko musikak gerturatzeko asmoarekin sortutako Sustraiez Blai Jaialdiak hamargarren edizioa egingo du larunbatean, azaroak 13. Bi eszenatoki jarri dituzte horretara, nagusia herriko plazan eta bestea Garagartza plazan.

Acoustic Glorious proiektuak emango dio hasiera jaialdiari arratsaldeko zazpietan eskainiko duten emanaldiarekin. Iban Nicolay bezalako musikariak biltzen dituen talde honek digeridoo, kora, saxoa edo beat boxa bezalako instrumentuak nahasten ditu. Haien atzetik, Vaskandombeando perkusio taldeak Ordiziako kaleak girotuko ditu.

Gaueko emanaldiei dagokienez, Dilshad dantza taldeak Luis Caminoren laguntza izango du eszenatokian. La Troba Kung-Fú katalandarrek rumba doinuen joera dantzagarri eta bizienak erakutsiko dituzte. Eta zuzeneko emanaldiei amaiera emateko, Madagaskar-etik datorren Kilemak instrumentu tradizionalen laguntzarekin sortutako ikuskizuna eskainiko du. Musikak Txindoki tabernan jarraituko du Dj Lord Sassafras-en emanaldiarekin.

Sustraiez Blai jaialdian eskainiko diren emanaldi guztiak doakoak izango dira