kultura
Itzulpena
Luis Baraiazarrari Espainiako Itzulpen Sari Nazionala kendu diote
Agentziak | Erredakzioa
Espainiako Kultura Ministerioak esan duenez, epaimahaiaren akats baten ondorioz onartu zuten euskaltzainaren hautagaitza, eta, saridun zela iragarri eta gutxira, bertan behera utzi dute saria.
Luis Baraiazarra euskaltzainak ez du Espainiako Itzulpen Sari Nazionala jasoko Santa Teresa Jesusenaren idazlan guztiak euskaratzeagatik, atzo saria emango ziotela iragarri bazuten ere, epaimahaiak akats baten ondorioz onartu baitzuen euskaltzainaren lana. Sariaren oinarriek zehazten dutenaren arabera, “atzerriko hizkuntza batean” egon behar da itzultzen den jatorrizko testua, eta Santa Teresa Jesusenaren lanak gaztelaniaz daude.
Espainiako Hezkuntza, Kultura eta Kirol Ministerioak epaimahaiaren ebazpena ezeztatu egin dutela zehaztu du, eta Baraiazarrari esan diotela eta barkamena eskatu diotela gaineratu du. Epaimahaikideak hurrengo egunetan batzartuko dira berriro.
Sariaren oinarriek zehazten dutenez, “atzerriko hizkuntza batetik Espainiako edozein hizkuntzatara itzulitako lanak saritzen dira, Espainian 2015ean argitaratutakoak”.
Jose Pascual Marco Kultura eta Liburuen Industria eta Politiken zuzendari nagusia izan da epaimahaiko burua, eta Monica Fernández, Gonzalo Navaza, Carme Arenas, Anna Gil, Isabel Garcia, Damaso Lopez, Agustín Valladolid, Carmen Mejia, Arnau Pons, Maria del Carmen Alonso Seisdedos eta Andres Urrutia euskaltzainburua izan ditu epaimahaikide.
Itzultzaile eta bertsozalea
“Itzulpen honi esker, Santa Teresa hobeto ezagutu ahal izan dut, gutun eta agirien bidez haren humanismoan murgildu naiz”, adierazi zuen atzo bizkaitar karmeldarrak, berak egin arte euskaraz ez zeuden testu batzuk euskarara ekartzeagatik jaso behar zuen sariaren aurrean “poz handia” erakutsita.
Luis Baraiazarra Txertudik (Meñaka, 1940) Meñakako eskolan egin zituen lehen ikasketak, 12 urte betetzeko zegoela Zornotzako karmeldarren ikastetxean sartu arte. Latina eta Giza Zientziak Zornotzan eta Nafarroako Alesbesen ikasi zituen. Filosofiako hiru urteak, berriz, Gasteizen egin zituen, eta Teologiako lau urteak, Begoñako Karmelon. 1966an, apaiztu eta Markina-Xemeinera joan zen. Harrezkero, bertan bizi da.
Eliza ikasketak egin ondoren, maisutza-ikasketak egin zituen, Valladoliden, eta geroago, Euskal Filologia, Deustuko Unibertsitatean. 1988ko azaroan, irakaskuntza utzi, eta Bostak Bat lantaldean hiztegigintzari ekin zion, dedikazio osoz. 1991ko abenduan, Hiztegi Batuko lantalde berrian batzordekide izendatu zuen Euskaltzaindiak, eta 1996an, Gramatika batzordeko kide. Pixka bat lehenago, urte berean, euskaltzain urgazle izendatu zuten.
Baraiazarra Bizkaiko Bertsozale Elkarteko idazkari izan da urte askoan, eta epaile zeregina bete du hainbat mailatan; Euskal Herriko Txapelketa Nagusian, bi aldiz izan da epaile eta beste behin ordezko.
