kultura
Saria
Gipuzkoako Urrezko Domina, Jakin taldearentzat
Agentziak | Erredakzioa
‘Jakin’ aldizkariaren bultzatzaileak sarituko dituzte, euskal hizkuntza eta kultura defendatzeagatik.
-
1956an sortu zuten 'Jakin' aldizkaria
Jakin kultura taldeak jasoko du Gipuzkoako Urrezko Domina aurten, Markel Olano Gipuzkoako ahaldun nagusiak iragarri duenez, euskal hizkuntza eta kultura defendatzeagatik.
Elkarrizketa batean, Olanok azaldu du Joseba Intxaustik, Joxe Azurmendik, Paulo Agirrebaltzategik eta Joan Mari Torrealdaik Jakin euskarazko aldizkaria martxan jartzen eman zuten pausoa “oso garrantzitsua” izan zela eta ekimen “azpimarragarria” ekarri zuela hizkuntza eta kultura alorretan.
“Ekarpen ezinbestekoa izan da hizkuntzaren bilakaeran eta euskal hizkuntza eta kultura berreskuratzeko bidean”, erantsi du.
Markel Olanoren hitzetan, Jakin taldea, 1956an sortutakoa, “oso ibilbide oparoa duten” lau pertsonak osatzen dute, eta, elkarrekin, “euskal hizkuntza eta kulturaren aldeko oso talde trinkoa” egin dute.
“Talde horri eusten jakin dute, eta azpimarratzekoa da, gure herrian eta gure kulturan parekorik ez duena: batuta eta nortasun handiz jarraitu dute gure kulturari ekarpena egiten eta eragiten. Merezi dute”, baieztatu du Olanok.
