Itxi

kultura

Musika

Xabier Castillo 'Xeberri', Dragoi Bola telesaileko kantuaren ahotsa, zendu da

EiTB Media

1973an Iparragirreren kantuekin disko bat grabatzen lehenetakoa izan zen, eta 1975ean Gontzal Mendibilekin 'Bagare' edota 'Kapitalismoak' kantuak biltzen zituen 'Zaurietatik dario' disko ikonikoa grabatu zuen.

  • Xabier Castillo Miota 'Xeberri' kantautore bizkaitarra hil da 73 urte zituela. Irudia: EiTB Media

    Xabier Castillo Miota 'Xeberri' kantautore bizkaitarra hil da 73 urte zituela. Irudia: EiTB Media

Xabier Castillo Miota Xeberri kantautore bizkaitarra hil da. 73 urte zituela zendu da istripuz, Berrizko Erroteta bere baserrian konponketa lanak egiten ari zela. Urte askoan bikoiztaile lanetan aritu zen, 'Dragoi Bola' telesailaren kantuagatik gogoratuko du batek baino gehiagok. ETB1ek eskaini zuen telesail ospetsua gazte askorentzako erreferentzia izan zen, euskalduntzeko tresna baliagarria bilakatuz.

1973an Iparragirreren kantuekin disko bat grabatzen lehenetakoa izan zen, eta 1975ean Gontzal Mendibilekin 'Bagare' edota 'Kapitalismoak' kantuak biltzen zituen 'Zaurietatik dario' disko ikonikoa grabatu zuen.

Robert Reford eta Antonio Banderas aktoreei eta Garfield edo Yamcha marrazki bizidunei ahotsa jarri zien.

Gontzal Mendibil Euskadi Irratiko Faktoria irratsaioan heriotzagatik "pena, pena" azaldu du. "Gaur goizean enteratu naiz, banekien nahiko makal zebilela, baina sekula ez duzu halakorik itxaroten", adierazi du.

"Bera joan zaigu, baina kantuak hemen geratzen dira", azpimarratu du musikariak. 'Zaurietatik dario" diskoaren 25.000 kopia saldu zituzten. "Gabon ostean atera zen, Durangoko Azokara ezin garaiz iritsi, baina kantaldiak egunero genituen", nabarmendu du Mendibilek. "Ni bikoiztaile bezala bi urte lan egin nituen, nik gero utzi nuen", gogorarazi du.

Xabier Castillo Xeberri-ren aldeko hileta-elizkizuna larunbat honetan Durangoko Santa Ana parrokian egingo dute, 19:00etan.