'El Conquistador del Amazonas'en finala, Txirrita, Leku eta Erkurekin

Gaur gauean jakingo dugu nor izango den "El Conquistador del Fin del Mundo" saioaren hamabigarren edizioko irabazlea. Nereak, Lekuk eta Erkuk Maixa azken edizioko irabazlearen ondorengoa izateko asmoa dute. Finala joan den astelehenean hasi zen orientazio proba batekin; ondoren, ontziak hartu zituzten, arraunean hasi ziren, eta Kolonbia eta Peru arteko mugan, mangladi baten erdian, utzi genituen.

Saioaren historiako final osoenetakoa izango da Txirritak, Lekuk eta Erkuk jokatuko dutena. Lehiakideek arraunean jarraitu beharko dute, arrainontzi erraldoi batera iritsi arte. Bertan, Amazonasko erraldoiak izango dituzte zain, arapaimak, pirarucu izenarekin ezagunak bertan. Arrastoei jarraituz, jumar bat egin beharko dute, tirolina bat ondoren, toki altu batetik uretara jauzi egin beharko dute jarraian, eta igeri egin beharko dute azkenean ikurrinara heltzeko. Irabazleak ur-hegazkin bat hartuta utziko du planetako birika berdea.

Gainera, abenturako lehiakide guztiak eta kapitainak izango dira platoan finalerako. Jaguarrekin, anakondekin eta pirañekin batera, lehiaketako unerik eta daturik garrantzitsuenak gogoratuko ditugu: oihanaren gogortasuna, saioa utzi zuten lehiakideen kopurua, Peio Ruiz Cabestany eta Patxi Salinas kapitainak, bateratzea, Juanma kaleratu ostean saioa utzi zuten lehiakideak… Gauza asko gogoratu eta argitu beharko dituzte protagonistek.

Telerrealitate saioaren irabazleak 20.000 euroko txeke bat jasoko du, eta une horretan bertan abiatuko da "El Conquistador del Fin del Mundo" saioaren hamahirugarren edizioa. Izan ere, castingak non eta noiz izango diren argituko du Julian Iantzik, eta lehiakide izan nahi dutenek bideocastingak zein helbidetara bidali beharko dituzten ere esango du.

"El Conquistador del Amazonas" saioaren finala zuzenean izango da ikusgai, ETB2n eta eitb.eus-en, 22:30etik aurrera. Asteazkenean, ikusle-entzuleen lehiakide gustukoena hautatzeko finala izango da ikusgai, ordu berean, Patxi Alonsoren eskutik.