telebista
Denboraldi berria
'Egun On Euskadi' eta 'Ahoz Aho' gaur itzuliko dira ETB1era eta eitb.eus-era
EITB
Goizeko 'Egun On Euskadi' albistegia Estepan Aldamiz-Etxebarriak gidatuko du, eta 'Ahoz Aho' arratsaldeko saioa Amaia Cayerok eta Ilaski Serranok aurkeztuko dute, 18:00etatik aurrera.
Gaur, 'Egun On Euskadi' eta 'Ahoz Aho' saioak bueltan izango dira ETB1eko eta eitb.eus-eko programazioan.
09:00etan hasita, 'Egun On Euskadi' saioak eguneko albiste garrantzitsuenak ekarriko dizkigu, eta lehen orduko informazio garrantzitsuenaren berri emango digu. Estepan Aldamiz-Etxebarria kazetaria izango da saioren gidari, eta Amane Ibañez lankideak egingo du eguneko albisteen kontakizuna.
Astelehen honetan, Itxaso Atutxa EAJko Bizkai Buru Batzarreko presidentea izango dute gonbidatu, eta Garbiñe Ubeda, Ludger Mees eta Felix Iriarte solaskideak bilduko dira mahai-inguruan.
Arratsaldean, 'Ahoz Aho' saioak egun-eguneko gaiak izango ditu hizpide, kulturarekin lotutakoak bereziki, Amaia Cayero eta Ilaski Serrano gidari. Denboraldi honetan, ordutegiz aldatuko du saioak, eta 18:00etan hasi eta iluntzeko 'Gaur Egun' albistegira bitartean izango da martxan.
Bestalde, Saioa Martijak jarraituko du 'Ahoz Aho+' saioaren gidaritza eramaten astearte gauero. Albistegi berezi honek sakonki aztertuko ditu egun-eguneko gaiak, eta gonbidatu berezi bat izango du astero.
