telebista
22:30ean
'Desaparecidos en Iparralde: casos abiertos', igande honetan, "360º" saioan
EiTB
Eider Hurtadok zuzentzen duen saioak desagertuta dauden Pertur, Naparra eta Irunen bizi ziren hiru gazte galiziarren arrastoa jarraituko du.
-
Eider Hurtado "360" saioaren aurkezle eta zuzendaria. EiTBko bideo batetik hartutako irudia.
Euskadin, gutxienez, hiru desagertze kasu daude ebatzi gabe. 70. eta 80. urteen artean gertatu ziren, borroka antifrankistak, Estatuaren errepresioak, ETAren atentatuek eta gerra zikinak markatutako testuinguruan. "360º" saioak Pertur, Naparra eta Galiziako hiru gazteen arrastoa jarraituko du igande honetan, 22:30ean, ETB2k eta eitb.eus-ek emango duten Desaparecidos en Iparralde: casos abiertos erreportajearen bidez.
Eider Hurtadok zuzentzen eta aurkezten duen saioak Francisco Etxeberria auzitegiko mediku ospetsuaren laguntza izango du. Joxe Miguel Etxeberria Naparra, Komando Autonomo Antikapitalistetako militante gaztea, 1980an desagertu zen, eta haren familiak bizitza osoa darama haren bila. Enekok, bere anaiak, duela hiru urte Paco Etxeberriarengana jo zuen gorpuzkiak aurkitzeko. Euren testigantzen bidez, Naparra bilatzeari ekingo diote. Kasua zabalik dago oraindik, CESIDeko agente ohi batek emandako zantzuen ostean.
"360º" Perturren arrastoan jarriko da. Eduardo Moreno Bergaretxe ETA politiko militarreko buruzagia 1976an desagertu zen. Hurtadok zuzentzen duen ikerketa-programak zuzeneko lekukoekin eta Perturren lankide ohiekin hitz egitea lortu du, hala nola, Martin Auzmendi, familiaren abokatu ohia, Eugenio Etxebeste Antxon ETAko buruzagi ohia, edo Ángel Amigo, ETApm-ko kide ohia. Erreportajeak desagertzeari buruzko bi hipotesi nagusien inguruko elementu guztiak xehatuko ditu: ETAko kideak ala Estatua izan zen Pertur desagerrarazi zuena? Mikel Aramendi kazetariak eta Iñaki Egaña historialariak ere euren ikerketak ekarriko dituzte.
Argitu gabeko hirugarren euskal kasuak Galiziaraino garamatza. "360º"k Isabel Fouz, Humberto Fouzen arreba, elkarrizketatuko du. 1973an Irunen desagertu ziren hiru gazte galiziarretako bati buruz hitz egingo dute. Haren familiak dio ETAk poliziekin nahastu ondoren hil zituela. Haren gorpuak ez dira inoiz agertu, eta kasua apenas ikertu zuten, Jonan Fernandez Eusko Jaurlaritzako Giza Eskubideen idazkari nagusiak gogoratzen duen bezala.
Desagertuen senide guztiek euren lagunak aurkitzen, zer gertatu den jakiten eta etapa mingarri bat ixten lagunduko dien informazioa eskatu dute.
