telebista
22:00etan
Txanbela Otxotea eta Tolosako Abesbatza Lehiaketa, gaur gauean, "Oholtzan" saioan
EiTB
Lehendabizi Txanbela Otxotearen euskal folkloreko lan koralak izango dira ikusgai, eta ondoren, 2018an eta 2019an Tolosako Abesbatza Lahiaketan izandako unerik onenak jasoko ditu saioak.
Informazio gehiago (1)
Aste honetan Ilaski Serranok aurkeztutako "Oholtzan" saioan bi emanaldi izango dira ikusgai. Lehenengoan, Txanbela Otxoteak Aralarren grabatutako emanaldia izango da ikusgai; bigarrenean, ostera, Tolosako Abesbatza Lehiaketan 2018 eta 2019 urteetako unerik onenak berreskuratuko dituzte.
Txanbela Otxoteak emango dio hasiera gauari. Taldea 2017an sortu zen Josean Vegaren eskutik eta Txanbela izeneko euskal musika tradizional batetik hartu du izena zortzikoteak. Eskarmentu handiko abeslariek osatzen dute egun taldea: Bautista Agirre eta Eduardo Zubikoa lehen tenore bezala, Xabier Barriola eta Fernando Idiakez bigarren tenore modura, Pablo Azpeitia eta Miguel Angel Segarra baritonoak eta Inaxio Olaizola eta Luis Arratibel baxuak.
Euskal folkloreko lan koralek osatzen dute batik bat otxotearen errepertorioa. Oraindik ibilbide laburra badute ere, Euskal Herriko hainbat jaialditan parte hartzeaz gain, AEBtako Cincinnaty May Festivalen ere izan ziren. "Cincinnati Music Hall" auditorioko zenbait kontzertutan hartu zuten parte, bai eta hiri hartako leku berezi batzuetan aire zabalean emandako beste zenbaitetan ere.
Ondoren, 2018 eta 2019an ospatutako Tolosako Abesbatza Lehiaketetan izandako unerik onenak eskainiko ditu "Oholtzan" saioak. COVID-19ak eragindako pandemia dela eta, aurten izan ezik 1969tik urtero ospatu izan den jaialdia da, eta munduko abesbatza onenak biltzea du jomuga.
2018ko edizioa, aldi berean, jaialdiaren 50. urtemuga izan zen, eta guztira 60 herrialdek hartu zuten parte. Larunbateko saioan, urte hartako hiru herrialderen emanaldiak ikusteko aukera izango dugu, guztira sei abesti. Jarraian, 2019ko edizioari ekingo zaio, non zazpi herrialderen ikuskizunez gozatzeko aukera izango da, zortzi abesti guztira.
"Oholtzan" saioa gaur da ikusgai, gaueko 22:00etatik aurrera, ETB1en eta eitb.eus-en.
