'El otro Guardaespaldas' filma eskainiko du gaur gauean "La Noche De..."k

Felix Linaresek aurkezten duen "La Noche De..." saioak El Otro Guardaespaldas (The Hitman's Bodyguard, 2017) akziozko komedia eskainiko du gaur gauean. Ryan Reynolds, Samuel Jackson, Gary Oldman eta Salma Hayek dira filmeko protagonistak. Pelikula Europa osoan grabatu zen, Londresetik Amsterdameraino, eta azken hiri horretan  kalerik garrantzitsuenetako bat itxi zuten, astebetez baino gehiagoz auto-ilara handiak sortuz.

Aurretik, Robert De Niro izango dute protagonista El Métido de... atalean. Saioak aktorearen estrategiak aztertuko ditu bere ibilbidean zehar interpretatu behar izan dituen paperetan sartzeko. Esate baterako, Jake La Mottaren papera egiteko 30 kilo nola hartu zituen azalduko du, edo egunero ordu bat hilkutxa batean eman zuela Mama Sangrienta filmatzeko.

Ondoren, Tu Banda Sonora Favorita atalean, Love Story eta Cinema Paradisoren musika ekarriko dute gogora, izenburu horien atzean ezkutatzen diren istorioak ezagutzeko.

Azkenik, Odio en las Entrañas tartean, Angelina Jolie eta Johnny Deppen arteko harreman txarra ezagutuko dugu, El Turista akziozko komedian bikote erromantiko baten paperak egin arren. Dirudienez, filmaketa hasi aurretik elkar miresten bazuten ere, hasi eta gutxira ez zuten elkar jasaten. Filmatu eta sei urtera, ordea, euren harremanak hobera egin eta lagunak dira egun.

"La NocheDe... El Otro Guardaespaldas" gaur izango da ikusgai, 22:30ean, ETB2n eta eitb.eus-en.