Kirol emanaldiek eta albistegiek audientzia bikaina izan dute ETB1en, igandean

Igande honetan, kirol emanaldiek eta albistegiek audientzia datu bikainak lortu dituzte ETB1en. "Gaur Egun" euskaldunen artean liderra izan da eguneko bi edizioetan. Eguerdiko albistegiak % 7,7ko audientzia-zatia eta euskaldunen arteko % 18,3ko kuota eskuratu ditu. Gaueko emanaldiak, ordea, % 8,9ko audientzia-zatia eskuratu du, urteko bigarren daturik altuena, eta euskaldunen artean % 19,1eko audientzia izan du.

Bestalde, igandeko Hondarribiko Banderaren emanaldiak bere ordu tartean lidergoa lortu du % 15,4ko audientzia-zatiarekin eta euskaldunen artean % 15,3ko kuota izan du. Emakumeek jokatutako Txingudiko Banderaren emanaldiak bere aldetik, % 7,2ko audientzia-zatia eskuratu du eta euskaldunen artean nagusi izan da % 9,5eko datuarekin.